స్నేహం, ప్రేమ, త్యాగం.. ఈ మూడు అంశాలు కలగలిపిన చిత్రం ‘మహర్షి’. మహేష్‌బాబు హీరోగా, పూజా హెగ్డే హీరోయిన్‌గా, అల్లరి నరేష్ కీలక పాత్రలో తెరకెక్కుతోన్న ఈ చిత్రంపై ఇప్పటికే భారీ అంచనాలున్నాయి. సక్సెస్‌ఫుల్ డైరెక్టర్ వంశీ పైడిపల్లి దర్శకత్వం వహిస్తోన్న ఈ చిత్రాన్ని వైజయంతీ మూవీస్, శ్రీ వెంకటేశ్వర క్రియేషన్స్, పీవీపీ సినిమా బ్యానర్లపై సి.అశ్వినీదత్, దిల్ రాజు, ప్రసాద్ వి.పొట్లూరి నిర్మిస్తున్నారు. తాజా సమాచారం ప్రకారం ఈ సినిమాలో మహేష్‌బాబు తన టాకీ పార్ట్‌ షూటింగ్‌ను పూర్తిచేసుకున్నారట. తన పాత్రకు డబ్బింగ్ కూడా మొదలుపెట్టారని అంటున్నారు. వాస్తవానికి మహేష్‌బాబు డైలాగ్ డెలివరీ మిగిలిన హీరోలతో పోలిస్తే చాలా భిన్నంగా ఉంటుంది. ‘పోకిరి’ సినిమాకు ప్రధాన బలాల్లో మహేష్ డైలాగ్ డెలివరీ కూడా ఒకటని చెప్పుకోవచ్చు. మహేష్‌బాబు కెరీర్‌లోనే ఈ సినిమా ఒక స్పెషల్. అయితే, ఇప్పుడు ‘మహర్షి’ సినిమాతో మహేష్ మరోసారి మాయ చేయబోతున్నారని తెలుస్తోంది. ఈ సినిమాలో మహేష్‌బాబు రెండు రకాల గొంతులతో మాట్లాడనున్నారట. ‘మహర్షి’లో మహేష్‌బాబు పాత్ర రెండు వేర్వేరు కాలాల్లో ఉంటుందట. ఆ కాలాలకు తగ్గట్టుగా తన వాయిస్‌లో కూడా తేడాలు చూపించాలని మహేష్‌బాబు నిర్ణయించుకున్నారని తెలుస్తోంది. ఇదే నిజమైతే మహేష్‌బాబు అభిమానులకు పండగే. దేవీశ్రీ ప్రసాద్ సంగీతం సమకూరుస్తోన్న ఈ చిత్రం మే 9న ప్రేక్షకుల ముందుకు వచ్చేందుకు సిద్ధమవుతోంది. ఇప్పటికే ప్రచార కార్యక్రమాలను మొదలుపెట్టిన నిర్మాతలు.. ఇటీవలే ‘ఛోటి ఛోటి బాతే’ పాటను విడుదల చేశారు. ఈ పాటకు ప్రేక్షకుల నుంచి మంచి స్పందన వస్తోంది. ఇక ఈ చిత్రంలో జగపతిబాబు, సోనాల్ చౌహన్, జయసుధ, పోసాని కృష్ణ మురళి, కోట శ్రీనివాసరావు, సాయి కుమార్, ప్రకాశ్ రాజ్, నరేష్ వీకే, మీనాక్షి దీక్షిత్ ముఖ్య పాత్రలు పోషించారు.