బాహుబలి’ సినిమాతో హీరో ప్రభాస్ స్థాయి అమాంతం పెరిగిపోయింది. ప్రస్తుతం దేశంలో ప్రభాస్ అంటే తెలియని సినీ ప్రేక్షకుడు ఉండరు. ప్రభాస్ క్రేజ్‌ను మరింత పెంచేలా, హాలీవుడ్ రేంజ్‌లో ‘సాహో’ సినిమాను తెరకెక్కిస్తున్నారు. ‘బాహుబలి’ లాంటి బ్లాక్ బస్టర్ హిట్ తరవాత ప్రభాస్ నటిస్తోన్న చిత్రం కావడంతో అంచనాలు కూడా భారీ స్థాయిలోనే ఉన్నాయి. ఈ అంచనాలకు ఎక్కడా తగ్గకుండా దుబాయ్‌లో భారీ యాక్షన్ సన్నివేశాలను తెరకెక్కించారు. ఈ యాక్షన్ సన్నివేశాలను హాలీవుడ్ నిపుణుల పర్యవేక్షణలో తెరకెక్కించారు. దాదాపు రూ.150 కోట్ల బడ్జెట్‌తో తెరకెక్కుతోన్న ఈ చిత్రానికి సుజీత్ దర్శకత్వం వహిస్తున్నారు. ఇప్పటికే విడుదలైన షేడ్స్ ఆఫ్ సాహో 1, 2లు సినిమా ఏ స్థాయిలో ఉండబోతుందో చెప్పాయి. అయితే, తాజాగా వినిపిస్తోన్న మరో వార్త సినిమాపై ఆసక్తిని మరింత పెంచేస్తోంది. ‘సాహో’లో ప్రత్యేక గీతం కోసం హాలీవుడ్ హీరోయిన్‌ను తీసుకొస్తున్నారట. పాప్ సింగర్‌గా, హీరోయిన్‌గా అంతర్జాతీయ స్థాయిలో గుర్తింపు తెచ్చుకున్న బ్రిటిష్ బ్యూటీ కైలీ మినోగ్ ‘సాహో’లో స్పెషల్ సాంగ్‌లో నటించడానికి అంగీకరించారని విశ్వసనీయ సమాచారం. కైలీ మినోగ్‌ ఒక భారతీయ సినిమాలో నటించడం ఇది రెండోసారి. 2009లో అక్షయ్ కుమార్ హీరోగా వచ్చిన ‘బ్లూ’ సినిమాలో కైలీ స్పెషల్ సాంగ్ చేశారు. మళ్లీ పదేళ్ల తరవాత ఇప్పుడు ప్రభాస్‌తో కలిసి నర్తించబోతున్నారు. అయితే, ప్రభాస్ కన్నా కైలీ వయసు చాలా ఎక్కువ కావడం విశేషం. ప్రస్తుతం కైలీ వయసు 50 ఏళ్లు. మరోవైపు, ప్రభాస్‌ హాలీవుడ్ బ్యూటీలతో డ్యాన్స్ చేయడం కొత్తేమీ కాదు. ‘బాహుబలి: ది బిగినింగ్’లో మనోహరి అనే పాటలో స్కార్లెట్ విల్సన్, నోరా ఫతేహితో ప్రభాస్ ఆడి పాడాడు. వీరిలో స్కార్లెట్ ఇంగ్లండ్‌కు చెందిన మోడల్, నటి కాగా.. నోరా కెనడాకు చెందిన మోడల్, డ్యాన్సర్. ఇదిలా ఉంటే, ‘సాహో’లో ప్రభాస్ సరసన బాలీవుడ్ హీరోయిన్ శ్రద్ధా కపూర్ నటిస్తోన్న సంగతి తెలిసిందే. ఈమెతో పాటు బాలీవుడ్‌కు చెందిన నీల్ నితిన్ ముకేష్, జాకీ ష్రాఫ్, మందిరా బేడి కీలక పాత్రలు పోషిస్తున్నారు. ఈ ఏడాది ఆగస్ట్ 15న ఈ చిత్రాన్ని విడుదల చేయడానికి ప్లాన్ చేస్తున్నారు.