ఏపీ ఎన్నికల్లో అందరి దృష్టిని ఆకర్షిస్తోన్న నియోజకవర్గాల్లో నరసాపురం లోక్ సభ నియోజకవర్గం ఒకటి. ఇక్కడి నుంచి జనసేన తరఫున పవన్ కళ్యాణ్ సోదరుడు నాగబాబు పోటీ చేస్తుండటమే దీనికి కారణం. పవన్ పోటీ చేస్తున్న భీమవరం అసెంబ్లీ సెగ్మెంట్ కూడా నరసాపురం పరిధిలోకే వస్తుంది. వైఎస్ఆర్సీపీ తరఫున రఘురామ కృష్ణం రాజు, టీడీపీ తరఫున వేటుకూరి శివరామరాజు పోటీ చేస్తున్నారు. వీరిద్దరూ బలమైన అభ్యర్థులు కావడంతో.. నరసాపురంలో హోరాహోరీ ఖాయంగా కనిపిస్తోంది. నాగబాబుతో పోలిస్తే.. వీరిద్దరూ ఆర్థికంగా బలవంతులు కూడా. ఇక్కడి నుంచి విజయం సాధించడం నాగబాబుకు నల్లేరు మీద నడకేం కాదు. జనసేన ఆశయాలను ప్రజల్లోకి తీసుకెళ్లడం ద్వారా విజయం సాధించాలని నాగబాబు భావిస్తున్నారు. నాగబాబుకు తోడుగా.. ఆయన కుమార్తె నిహారిక ప్రచారం చేస్తున్న సంగతి తెలిసిందే. నాగబాబు విజయాన్ని ఆకాంక్షిస్తూ.. జబర్దస్త్ టీం కూడా నరసాపురం నియోజకవర్గంలో ప్రచారం నిర్వహిస్తోంది. హైపర్ ఆది, రాం ప్రసాద్, రాకింగ్ రాకేశ్‌లు నాగబాబు కోసం ఇంటింటికి వెళ్లి ప్రచారం నిర్వహిస్తున్నారు. జనసేన కరపత్రాలను పంచుతూ.. నాగబాబుకు ఓటేయాలని కోరుతున్నారు. ఇందుకు సంబంధించిన ఫొటోలు సోషల్ మీడియాలో వైరల్‌గా మారాయి.