ఐపీఎల్ 2019 సీజన్‌లో వరుసగా నాలుగు ఓటములతో రాయల్ ఛాలెంజర్స్ బెంగళూరు టీమ్ అభిమానుల్ని నిరాశపరిచింది. కానీ.. ఆ జట్టుకి ఇప్పటికీ టైటిల్ గెలిచే అవకాశాలున్నాయని 2015 ఐపీఎల్ సీజన్‌ని ఉటకిస్తూ కొందరు అభిమానులు ధీమా వ్యక్తం చేస్తున్నారు. 2015 ఐపీఎల్ సీజన్‌లో ముంబయి ఇండియన్స్‌ టీమ్‌ కూడా ఇలానే తొలి నాలుగు మ్యాచ్‌ల్లోనూ చిత్తుగా ఓడిపోయింది.. కానీ.. ఆ తర్వాత జోరందుకున్న రోహిత్ సేన.. వరుస విజయాలతో ఏకంగా టైటిల్‌ను ఎగరేసుకుపోయింది. తాజా సీజన్‌లో బెంగళూరు అదే బాటలో పయనిస్తోందంటూ అభిమానులు సోషల్ మీడియాలో జోస్యం చెప్తున్నారు. ఐపీఎల్ సీజన్‌లో కోల్‌కతా నైట్‌రైడర్స్ చేతిలో ముంబయి ఇండియన్స్ తొలి మ్యాచ్‌లో 7 వికెట్ల తేడాతో ఓడిపోగా.. 2019 ఐపీఎల్ సీజన్‌లో తొలి మ్యాచ్‌లో చెన్నై సూపర్ కింగ్స్ చేతిలో బెంగళూరు కూడా సరిగ్గా 7 వికెట్ల తేడాతోనే ఓడిపోయింది. 12 ఏళ్ల ఐపీఎల్ చరిత్రలో ఇప్పటి వరకూ బెంగళూరు జట్టు కనీసం ఒక్కసారి కూడా టైటిల్ గెలవలేకపోయిన విషయం తెలిసిందే. తాజా సీజన్‌లో ఆ జట్టు ఐదో మ్యాచ్‌ను బెంగళూరు వేదికగా కోల్‌కతా నైట్‌రైడర్స్‌తో శుక్రవారం ఆడనుంది.