ఏపీ ఎన్నికల్లో చిత్ర విచిత్ర పరిస్థితి నెలకొంది. పోలింగ్ తేదీ సమీపిస్తున్నా.. ప్రధాన పార్టీలైన టీడీపీ, వైసీపీలు మేనిఫెస్టో ఊసే ఎత్తడం లేదు. ఇందుకు ముఖ్య కారణం.. ‘కాపీ’. ఔను, తమ ఎన్నికల ప్రణాళికను ప్రత్యర్థి పార్టీ కాపీ కొట్టేస్తుందనే భయంతో రెండు పార్టీలు ‘నువ్వు ముందంటే, కాదు నువ్వే ముందు’ అన్నట్లు వ్యవహరిస్తున్నాయి. ఏపీ ఎన్నికల్లో ఇప్పటివరకు పవన్ కళ్యాణ్ పార్టీ ‘జనసేన’ మినహా మరే పార్టీ తమ మేనిఫెస్టో విడుదల చేయలేదు. సాధారణంగా ఎన్నికల్లో మేనిఫెస్టోను సిద్ధం చేసుకుని అభ్యర్థులు ప్రచారంలో పాల్గొంటారు. కానీ, ఏపీ ఎన్నికల్లో పరిస్థితి భిన్నంగా ఉంది. టీడీపీ పార్టీ ఇప్పటివరకు ఏపీలో అమలు చేసిన పథకాలను మాత్రమే సభల్లో ప్రచారం చేస్తోంది. కొత్త హామీల ఊసు లేకుండానే నేతలు ఓట్లు అభ్యర్థిస్తున్నారు. ప్రత్యర్థి పార్టీలపై ఆరోపణలతోనే ప్రజలను ఆకట్టుకునే ప్రయత్నం చేస్తున్నారు. మరోవైపు వైసీపీ కూడా ఇదే దోరణి అవలంభిస్తోంది. గతంలో జగన్ ప్రకటించిన హామీలనే ఆ పార్టీ నేతలు ప్రచారం చేస్తున్నారు. తమ మేనిఫెస్టోలోని అంశాలను బయటపెట్టే సాహసం మాత్రం చేయడం లేదు. వాస్తవానికి ఈ రెండు పార్టీల మేనిఫెస్టో ఇప్పటికే సిద్ధమైంది. అయితే, ముందు ఎవరు విడుదల చేస్తారా అని ఎదురుచూస్తున్నారు. ఒక వేళ ముందుగా తమ మేనిఫెస్టోను విడుదల చేస్తే.. అవతల పార్టీ దాన్ని కాపీ కొట్టేస్తుందనే భయం వారిని వెంటాడుతోంది. ముఖ్యం వైసీపీలో భయం ఎక్కువగానే ఉంది. ఎన్నికల షెడ్యూల్ ప్రకటనకు ముందే ఏపీ సీఎం చంద్రబాబు నాయుడు పింఛన్‌ను రూ.2వేలకు పెంచారు. అయితే, అది తమ పార్టీ హామీ అని, టీడీపీ కాపీ కొట్టేసిందని వైసీపీ ఆరోపించింది. తమ పార్టీ వార్షిక సమావేశంలో విడుదల చేసిన ‘నవరత్నాలు’లో ఈ హామీ ఉందని వాదిస్తోంది. గతేడాది తెలంగాణ ఎన్నికల్లో కూడా ఇదే పరిస్థితి కనిపించింది. కాంగ్రెస్ పార్టీ, టీడీపీ, వామపక్షాలతో కలిసి కూటమి కట్టడంతో మేనిఫెస్టోను వెంటనే విడుదల చేయాలేదు. ఈ నేపథ్యంలో టీఆర్ఎస్ కూడా తమ మేనిఫెస్టో విడుదలలో జాప్యం చేసింది. ముందుగా మేనిఫెస్టోలోని కొన్ని అంశాలను మాత్రమే ప్రకటించింది. ఆ తర్వాత మహాకూటమి, టీఆర్ఎస్‌లు మేనిఫెస్టోలు విడుదల చేసి.. అవి తమ హామీలను కాపీ కొట్టేశారంటూ పరస్పర ఆరోపణలు చేసుకున్నారు.ఇరుపార్టీలు రాష్ట్రంలో అన్ని వర్గాలను ఆకట్టుకునే విధంగా తమ మేనిఫెస్టోను సిద్ధం చేసినట్లు తెలుస్తోంది. మహిళలు, వృద్ధులు, రైతులు, వెనుకబడిన తరగతి ప్రజల ఓట్లనే లక్ష్యంగా చేసుకున్నట్లు సమాచారం. ప్రస్తుతం చంద్రబాబు నాయుడు తన ప్రచారంలో ప్రధానంగా 10 హామీలు ఇస్తున్నారు. ఇందులో రూ.10 వేల కోట్ల పెట్టుబడితో వెనుకబడిన వర్గా(బీసీ)లకు ప్రత్యేక బ్యాంకు ఏర్పాటు ముఖ్యమైనది. అలాగే, వైసీపీ అధినేత జగన్ నిరుద్యోగులనే లక్ష్యంగా చేసుకున్నారు. ఆయన అధికారంలోకి వస్తే 2.3 లక్షల ఉద్యోగాలను భర్తీ చేస్తానని హమీ ఇస్తున్నారు. పేదలకు పక్కా ఇళ్ల నిర్మాణంపై కూడా టీడీపీ, వైసీపీలు భారీ హామీలు ఇస్తున్నాయి. మరి.. ఓటర్లకు అసలైన కిక్ ఇచ్చే మేనిఫెస్టోను ఎప్పుడు బయటకు తీస్తారనేది వారికే తెలియాలి.