అభ్యర్థులను చూసి ఓటేసే రోజులు దాదాపు కనుమరుగయ్యాయి. ఇప్పుడంతా పార్టీలు, ఆ పార్టీలు పెట్టే ప్రలోభాలను చూసే ఓటేస్తున్నారు. ఈ క్రమంలో ప్రజలు తమ అభ్యర్థి మంచోడా, చెడ్డవాడా అని కూడా ఆలోచించడం లేదు. దీంతో నేరగాళ్లు యదేచ్ఛగా బరిలోకి దిగుతున్నారు. వీరిలో హత్యలు, మోసాలు, దౌర్జన్యాలు వంటి నేరాభియోగాలు ఎదుర్కొంటున్నవారే ఎక్కువగా ఉన్నారు. ఏ పార్టీలో ఎంతమంది?: ప్రస్తుతం ఆంధ్రప్రదేశ్ ఎన్నికల్లో బరిలో దిగిన అభ్యర్థుల్లో నేరగాళ్ల సంఖ్య చూస్తే.. నేరగాళ్లకు టికెట్లు ఇవ్వడంలో రాజకీయ పార్టీలు పోటీ పడుతున్నాయా? లేదా నేరగాళ్లే పార్టీ టికెట్లు పొందేందుకు పోటీ పడుతున్నారా? అనే అనుమానం కలగక మానదు. డబ్బు బలం, దౌర్జన్యం చేసే సత్తా ఉంటే చాలు వారికి రాజకీయ పార్టీలు ఎర్ర తివాచీ వేసి మరీ టికెట్లు ఇస్తున్నాయి. ఈ ఎన్నికల్లో 175 స్థానాల్లో బరిలోకి దిగిన మొత్తం 2,186 మంది అభ్యర్థులు బరిలోకి దిగారు. నామినేషన్లు సందర్భంగా అభ్యర్థులు దాఖలు చేసిన అఫిడవిట్లలో పేర్కొన్న వివరాల ప్రకారం.. ప్రధాన పార్టీలైన టీడీపీ, వైసీపీ, జనసేనల నుంచి బరిలో దిగిన అభ్యర్థుల్లో 171 మందిపై నేరాభియోగాలు ఉన్నాయి. వైసీపీలో 97, టీడీపీలో 49, జనసేనలో 25 మందిపై పలు కేసులు ఉన్నాయి. వీరిలో హత్యలు, హత్యాయత్నాలు, చోరీలు, ఆర్థిక నేరాలు వంటి అభియోగాలు ఎదుర్కొంటున్నవారే ఎక్కువ. వైసీపీలో అత్యధిక కేసులు ఆ పార్టీ అధినేత జగన్‌పైనే ఉన్నాయి. మొత్తం 31 కేసులతో ఆయన ముందంజలో ఉన్నారు. వీటిలో 11 సీబీఐ, 7 ఈడీ కేసులు ఉన్నాయి. ఆయన తర్వాతి స్థానంలో దెందులూరు టీడీపీ అభ్యర్థి చింతమనేని ప్రభాకర్ ఉన్నారు. ఆయనపై 26 కేసులు ఉన్నాయి. వైసీపీ అభ్యర్థి ధర్మాన ప్రసాద్ జగన్ అక్రమ ఆస్తుల కేసులో నిందితుడిగా ఉన్నారు. ఇలా ఒక్కో అభ్యర్థి నేరాల గురించి చెబితే పెద్ద చిట్టానే అవుతుంది. జనసేన అభ్యర్థుల్లో కొందరిపై ఏకంగా హత్య, దోపిడీ కేసులే ఉన్నాయి.ఇక టీడీపీ అధినేత చంద్రబాబు నాయుడుపై బాబ్లీ కేసు మాత్రమే ఉంది. మహారాష్ట్రలో బాబ్లీ ప్రాజెక్టు వద్ద ఆందోళనకు దిగిన సందర్భంలో ఈ కేసు నమోదైంది. టీడీపీలో ఎప్పుడూ వివాదాలతో వార్తల్లో ఉండే చింతమనేనిపై హత్యాయత్నం, ఎస్సీ-ఎస్టీ వేధింపుల చట్టం, మహిళలపై దౌర్జన్యం, ప్రభుత్వ అధికారుల విధులకు ఆటంకం కలిగించడం, దళితులను దూషించడం వంటి కేసులు ఉన్నాయి. చీరాల వైసీపీ అభ్యర్థి ఆమంచి కృష్ణమోహన్‌‌పై హత్యాయత్నం, మహిళను కించపరచడం, అసభ్యంగా వ్యవహరించడం, దాడులు చేయడం, దళిత పోలీస్ అధికారిని దూషించడం వంటి కేసులు కూడా ఉన్నాయి. ధర్మవరం జనసేన అభ్యర్థి చిలకం మధుసూదన్ రెడ్డి‌.. ఇంట్లోకి చొరబడి, తుపాకీ పేల్చి.. ఇంటికి నిప్పు పెట్టిన కేసులో నిందితుడిగా ఉన్నారు. రాప్తాడు వైసీపీ అభ్యర్థిపై హత్యాయత్నం, మరాణాయుధాలతో అల్లరు సృష్టించిన కేసులు ఉన్నాయి. సర్వేపల్లి వైసీపీ అభ్యర్థి కాకాణి గోవర్దన్‌రెడ్డిపై ఫోర్జరీ పత్రాల సృష్టి, కల్తీ మద్యం తయారీ, భూకబ్జా, అక్రమ రవాణా కేసులు ఉన్నాయి. ధర్మవరం వైసీపీ అభ్యర్థి కేతిరెడ్డి వెంకటరామిరెడ్డిపై ఆయుధాలతో దాడి, హత్య బెదిరింపులు, మహిళలను కించపరచడం వంటి కేసులు ఉన్నట్లు అఫిడవిట్లలో ఉన్నాయి. అనకాపల్లి టీడీపీ అభ్యర్థి పీలా గోవింద సత్యనారాయణపై ఇల్లు ధ్వంసం చేసిన కేసు ఉంది. రామచంద్రాపురం అభ్యర్థి తోట త్రిమూర్తులుపై ఏకంగా కిడ్నాప్ కేసే ఉంది. ఒకప్పుడు ఉత్తరాది రాష్ట్రాలైన బీహార్, ఉత్తరప్రదేశ్‌లో మాత్రమే నేరగాళ్లు ఎన్నికల్లో పోటీ చేసే ‘సాంప్రదాయం’ ఉండేది. ఇప్పుడు ఏపీకీ పాకింది. మున్ముందు ఇదే కొనసాగితే.. నవ్యాంధ్రప్రదేశ్ నేరగాళ్ల రాష్ట్రంగా మారిన ఆశ్చర్యపోవక్కర్లేదు. కాబట్టి.. మీ నేతల నేరాల చిట్టా ముందుగానే తెలుసుకుని మంచి అభ్యర్థికి ఓటేయండి. ‘నోటు’కు భయపడి నేరగాళ్ల ఓటేస్తే.. అధికారికంగా ప్రజల సొమ్మును దోచేస్తారు. మీకు అభ్యర్థులు ఎవరూ నచ్చకపోతే నోటా  నొక్కేయండి.