నేను జగన్‌లా పైకి ఒకటి మాట్లాడుతూ లోపల ఒకటి చేయడం లేదు. సొంత కులం అని చెప్పి వచ్చిన వాళ్లే నాలాంటి వాళ్లను దెబ్బ కొడతారని పవన్ కళ్యాణ్ ఘాటైన వ్యాఖ్యలు చేశారు. తోట త్రిమూర్తుల్ని తానెప్పుడూ పార్టీలోకి ఆహ్వానించలేదని స్పష్టం చేసిన జనసేనాని.. కాన్షీరాం ఇలాంటి వాళ్లను ‘చెంచాలు’ అని అంటారని విమర్శించారు. పవన్ వాళ్ల అన్నయ్య మాటే వినడు.. తోట త్రిమూర్తులు మాట ఏం వింటాడని జనసేనాని వ్యాఖ్యానించారు. జాతి గౌరవం నిలబెట్టడం నిలబెట్టుకోవడం నేర్చుకోండి తోట త్రిమూర్తులు గారూ.. మర్యాద ఇచ్చాను, నిలబెట్టుకోండని సోమవారం అమలాపురంలో నిర్వహించిన సభలో పవన్ ఘాటైన వ్యాఖ్యలు చేశారు. తెలుగుదేశం మోచేతి నీళ్లు తాగాలంటే మీరు తాగండి మీ ఇష్టం అని.. తోట త్రిమూర్తుల్ని ఉద్దేశించి పవన్ వ్యాఖ్యానించారు. టీడీపీతో నేను కలిసే ఉన్నానని మీకు ఎప్పుడైనా చెప్పానా? అని రామచంద్రాపురం సిట్టింగ్ ఎమ్మెల్యే తోట త్రిమూర్తుల్ని పవన్ కళ్యాణ్ ప్రశ్నించారు. ‘జగన్ కాపు రిజర్వేషన్ల గురించి మాట్లాడమంటే పారిపోయారు. నేను కాపు కులంలో పుట్టాను దానికి నేనేం చేయలేను. నాకు కులపిచ్చి లేదు, కాపు కులం మీద కచ్చితంగా గౌరవం ఉంది. కాపులు, శెట్టి బలిజల మధ్య గొడవలున్నాయి. నేను శెట్టి బలిజ నేతలతో మాట్లాడా’నన్నారు. టీడీపీతో లాలూచీ ఉందని మెట్ల సత్యనారాయణ వాళ్ల అబ్బాయి చెబుతున్నారు. మీ మాటలను ఉపసంహరించుకోండి. ఇంకా మీరు టీడీపీ నేతలకు, జగన్‌కు ఊడిగం చేస్తానంటే బానిస బతుకు బతకండి, ఎవరూ కాదనరు. కొత్త తరాన్ని ముందుకు తీసుకెళ్తుంటే ఆపుతారెందుకు. సిగ్గుండాలి మీకు, పౌరుషం లేదా? కోనసీమ పుట్టుక పుట్టలేదా? అని పవన్ ఘాటైన వ్యాఖ్యలు చేశారు. కొత్త తరంతోనూ బానిస బతుకులు ఎందుకు బతకనిస్తారు? అని పవన్ ప్రశ్నించారు. ప్రజారాజ్యం పార్టీని సొంతవాళ్లే చంపేశారు. బయటివాళ్లు చంపలేదు. పదిమందితో ఊడిగం చేయించి ఒకరికి టికెట్లు ఇచ్చే దుర్గతి వైసీపీ నాయకులకు ఉందేమో. బీఫామ్‌కి టికెట్లు అమ్ముకోవడానికి మేమైనా జగన్ అనుకుంటున్నారా? టికెట్లు అమ్ముకునే గతి జగన్‌కు పట్టిందేమో కానీ.. అన్న చిరంజీవికిగానీ, జనసేనకుగానీ పట్టలేదని గుర్తుంచుకోండి. చిరంజీవి లాంటి బలమైన వ్యక్తికి కూడా కులం అంటగట్టారు. మీ దగ్గర పని చేసినంత కాలం కులం అంటగట్టరు కానీ.. సొంత పార్టీ పెడితే మాత్రం కులం అంటగడతారా? అని జగన్, చంద్రబాబు‌లను పవన్ ప్రశ్నించారు