సినీ నటుడు, హిందూపురం ఎమ్మెల్యే బాలయ్య తరచూ ఏదో ఒక వివాదంలో చిక్కుకుంటున్నారు. ఎన్నికల ప్రచారంలో టీడీపీ కార్యకర్తలు, అభిమానులతో దురుసుగా ప్రవర్తిస్తూ వార్తల్లో నిలుస్తున్నారు. హిందూపురంలో అయితే ఏకంగా వీడియో జర్నలిస్టుపై దాడి చేయడం కలకలంరేపింది. ఇలా వరుస వివాదాలు వెంటాడటంపై బాలయ్య సతీమణి వసుంధర స్పందించారు. ఓ న్యూస్ ఛానల్‌కు ఇచ్చిన ఇంటర్వ్యూలో ఈ వివాదాలపై తన అభిప్రాయాన్ని చెప్పారు. బాలయ్య అభిమానులతో చాలా చనువుగా ఉంటారంటున్నారు వసుంధర. ఫ్యాన్స్‌ను 'మనవాళ్లే' అనుకునే మనస్తత్వమని.. బాలయ్య ఓ దెబ్బ కొట్టినా ఏమీ అనుకోరన్నారు. అభిమానులకు బాలయ్య అంటే ఇష్టమని.. అందుకే వారు సంతోషంగానే ఉంటారన్నారు. కొందరు గిట్టనివాళ్లు బాలయ్య వీడియోలతో తప్పుడు ప్రచారం చేస్తారని చెప్పుకొచ్చారు. ఎమ్మెల్యేగా గెలిచిన తర్వాత హిందూపురం అభివృద్ధికి ఎంతో కృషి చేశారంటున్నారు వసుంధర. పేదలకు అండగా ఉండే మనస్తత్వం బాలయ్యది.. వారు కష్టాల్లో ఉంటే చూడలేరన్నారు. బసవతారకం ఆస్పత్రి ఛైర్మన్‌గా బాలయ్య.. పేద, మధ్యతరగతి ప్రజలు.. ఇలా ఎవరొచ్చినా వైద్యం అందిస్తున్నారని.. సీఎం రిలీఫ్ ఫండ్ నుంచి నిధులు వచ్చినా.. రాకపోయినా అందరికి చికిత్స అందేలా చొరవ తీసుకుంటారని వసుంధర చెప్పారు.