అనంతపురం జిల్లాలోని  తనకల్లు, నల్లచెర్వు మండలాల సమీపంలోని 42వ నంబరు జాతీయ రహదారిపై ఘోర రోడ్డుప్రమాదం జరిగింది. కంటైనర్-మినీ వ్యాన్ ఢీకొని ఐదుగురు దుర్మరణం చెందారు. మరో ఎనమిది మందికి గాయాలయ్యాయి. వారిలో ఆరుగురు పరిస్థితి విషమంగా ఉంది. క్షతగాత్రులను కదిరి ఆస్పత్రికి తరలించారు. కుక్కంటి క్రాస్ నుంచి ప్రయాణికులతో కదిరి వెళ్తున్న మినీ బస్సు తనకల్లు మండలం పరాకువాండ్లపల్లి క్రాస్ వద్ద అదుపుతప్పి ఎదురుగా వస్తున్న లారీని ఢీకొట్టింది.

 మృతులు నగేష్ (32), భారతి (50), ఖాదర్బాషా (45), మహబూబ్ బాషా (45), జయమ్మ (45)గా పోలీసులు గుర్తించారు. మృతుల సంఖ్య మరింత పెరిగే అవకాశం ఉన్నట్లు సమాచారం. డ్రైవర్ నిర్లక్ష్యం, అతి వేగం కారణంగానే ప్రమాదం సంభవించినట్టు ప్రత్యక్ష సాక్షులు తెలిపారు.  సమాచారం అందుకున్న పోలీసులు ఘటనాస్థలికి చేరుకుని ప్రమాదం జరిగిన తీరును పరిశీలించి దర్యాప్తు చేస్తున్నారు.