వివాదాస్పద దర్శకుడు రామ్ గోపాల్ వర్మ ప్రస్తుతం బయోపిక్‌లపై పడ్డారు. ఇప్పటికే ఎన్టీఆర్ జీవిత కథ ఆధారంగా ‘లక్ష్మీస్ ఎన్టీఆర్’ సినిమాను తెరకెక్కించిన వర్మ తీవ్ర దుమారమే రేపారు. తెలంగాణలో విడుదలైన ఈ సినిమా ఏపీలో ఇప్పటికీ రిలీజ్ కాలేదు. అయితే, ఈ సినిమాను ప్రేక్షకులు విశేషంగా ఆదరించారు. సినిమా హిట్ కావడంతో వెంటనే తమిళనాడు దివంగత మాజీ ముఖ్యమంత్రి జయలలిత ఆప్తమిత్రురాలు శశికళ బయోపిక్‌ను వర్మ ప్రకటించారు. ఇది ఇంకా సెట్స్‌పైకి వెళ్లలేదు. ఈలోగా మరో బయోపిక్‌ను వర్మ ప్రకటించేశారు. తెలంగాణ ఉద్యమ సింహం, గులాబీ దళపతి, రాష్ట్ర ముఖ్యమంత్రి కె.చంద్రశేఖర్‌ రావు జీవితం ఆధారంగా రామ్ గోపాల్ వర్మ సినిమాను తెరకెక్కిస్తున్నారు. ఆంధ్ర పాలకుల నుంచి కేసీఆర్ ఎదుర్కొన్న ఇబ్బందులు, తెలంగాణ రాష్ట్రాన్ని ఆయన సాధించిన తీరును సినిమాలో వర్మ చూపించబోతున్నారు. ఈ సినిమాకు ‘ది అగ్రెసివ్ గాంధీ’ అనే పవర్‌ఫుల్ ట్యాగ్‌లైన్‌ను వర్మ పెట్టారు. ‘ఆడు తెలంగాణ తెస్తనంటే అందరూ నవ్విండ్రు’ అనే డైలాగును పోస్టర్‌పై రాశారు. మొత్తానికి కేసీఆర్‌ను, ఆయన ఉద్యమాన్ని ఆకాశానికి ఎత్తేస్తూ వర్మ సినిమా తీయనున్నారు. ‘లక్ష్మీస్ ఎన్టీఆర్’ సినిమాలో చంద్రబాబు నాయుడిని పూర్తి నెగిటివ్‌గా చూపించిన వర్మ.. ఇప్పుడు కేసీఆర్‌ బయోపిక్‌ను ప్రకటించడం చర్చకు తావిస్తోంది.కేసీఆర్ బయోపిక్‌ను వర్మ ట్విట్టర్ ద్వారా ప్రకటించిన వెంటనే ఆ ట్వీట్‌కు లైకులు, కామెంట్ల వర్షం మొదలైంది. టైటిల్ అద్భుతంగా ఉందని కేసీఆర్ అభిమానులు వర్మను కొనియాడుతున్నారు. ‘జై కేసీఆర్.. జై ఆర్జీవీ’ అంటూ కామెంట్లు పెడుతున్నారు. అయితే, రాజకీయంతో ముడిపడి ఉన్న ఈ బయోపిక్ ద్వారా ఆంధ్ర ప్రజలందరినీ తప్పుగా చూపించొద్దంటూ కొంత మంది ఆర్టీవీని హెచ్చరిస్తున్నారు. కేసీఆర్ జీవితకథపై ఇప్పటికే రెండు సినిమాలు తెరకెక్కాయి. ‘ఉద్యమ సింహం’ సినిమాపై కోర్టులో కేసులు నమోదుచేయడంతో నిర్మాతలు యూట్యూబ్‌లో విడుదల చేసేశారు. మరోవైపు, శ్రీకాంత్ హీరోగా కూడా ‘తెలంగాణ దేవుడు’ పేరిట కేసీఆర్ బయోపిక్‌ను తెరకెక్కించారు. ఈ సినిమా ఇంకా విడుదల కాలేదు. అసలు, విడుదల అవుతుందో లేదో కూడా తెలీదు. ఈ నేపథ్యంలో ఆర్జీవీ కేసీఆర్ బయోపిక్‌ను ప్రకటించడం ఆసక్తికరం.