యువ్ న్యూస్ స్పోర్ట్స్ బ్యూరో:

 ఆఖరి ఓవర్‌ వరకు ఉత్కంఠభరితంగా సాగిన మ్యాచ్‌లో చివరకు రాయల్‌ చాలెంజర్స్‌ బెంగళూరుకు గట్టెక్కింది. భారీ స్కోరును ఛేదించే క్రమంలో నితీశ్‌ రాణా (46 బంతుల్లో 9 ఫోర్లు, 5 సిక్సర్లతో 85 నాటౌట్‌), రస్సెల్‌ (25 బంతుల్లో 2 ఫోర్లు, 9 సిక్సర్లతో 65) వీరోచిత పోరాటం అలరించింది. కానీ ఆర్‌సీబీ 10 పరుగుల తేడాతో నెగ్గి సీజన్‌లో రెండో విజయం అందుకుంది. అటు కోల్‌కతా కు ఇది వరుసగా నాలుగో పరాజయం. శుక్రవారం జరిగిన ఈ మ్యాచ్‌లో ముందుగా బ్యాటింగ్‌కు దిగిన బెంగళూరు జట్టు కెప్టెన్‌ విరాట్‌ కోహ్లీ సెంచరీ (58 బంతుల్లో 9 ఫోర్లు, 4 సిక్సర్లతో 100)తో 20 ఓవర్లలో 4 వికెట్లకు 213 పరుగులు చేసింది. మొయిన్‌ అలీ (28 బంతుల్లో 5 ఫోర్లు, 6 సిక్సర్లతో 66) తుఫాన్‌ ఇన్నింగ్స్‌తో అలరించాడు. ఆ తర్వాత ఛేదనలో కోల్‌కతా 20 ఓవర్లలో 5 వికెట్లకు 203 పరుగులు చేసి ఓడింది. మ్యాన్‌ ఆఫ్‌ ద మ్యాచ్‌గా కోహ్లీ నిలిచాడు.