యువ్ న్యూస్ జనరల్ బ్యూరో:

 శ్రీలంక వరుస బాంబు పేలుళ్ల ఘటనలో మృతుల సంఖ్య అంతకంతకూ పెరుగుతోంది. సోమవారం ఉదయానికి ఈ సంఖ్య 290కి చేరినట్లు అధికారులు వెల్లడించారు. మరో 500 మందికిపైగా ఇంకా ఆసుపత్రుల్లో చికిత్స పొందుతున్నట్లు తెలిపారు. ఇప్పటివరకు ఈ దాడులతో సంబంధం ఉన్న మొత్తం 24 మంది నిందితుల్ని పోలీసులు అదుపులోకి తీసుకున్నట్లు సమాచారం. మరోవైపు భద్రతా కారణాల దృష్ట్యా ఆదివారం దేశవ్యాప్తంగా విధించిన నిరవధిక కర్ఫ్వూను ఎత్తివేస్తున్నట్లు శ్రీలంక ప్రభుత్వం ప్రకటించింది. శ్రీలంక ఎయిర్‌పోర్టు ప్రాంతంలో అమర్చిన ఓ పైపు బాంబును తాజాగా భద్రతా సిబ్బంది కనుగొని నిర్వీర్యం చేశారు.