నటుడిలో ఉన్న కొత్త కోణాన్ని ఆవిష్కరించడమే దర్శకుడు పని. కాని అప్పటికే సహజసిద్ధమైన నటనతో ప్రేక్షకులతో శెభాష్ అనిపించుకుని నేచురల్ స్టార్‌ నానికి అర్జున్ పాత్ర ద్వారా సవాల్ విసిరారు దర్శకుడు గౌతమ్ తిన్ననూరి. పాత్రలనేవి కథలో భాగంగా ఉంటాయి. కాని ఆ పాత్రలే కొన్ని కథలకు ప్రాణంగా మారుతుంటాయి. ఆ పాత్ర అతను చేస్తేనే కథ పరిపూర్ణం అవుతుంది అనిపించే కథలు అప్పుడప్పుడూ మాత్రమే వస్తుంటాయి. అలా వచ్చిన కథే ‘జెర్సీ’. ఉత్తమ నటుడిగా డబుల్ హ్యాట్రిక్ విజయాలతో తనను తాను ప్రూవ్ చేసుకున్న నానికి జెర్సీ చిత్రంలోని అర్జున్ పాత్ర ఒక సవాల్. ఉత్తమ నటుడ్ని అత్యత్తమ నటుడుగా తీర్చిదిద్దాడు దర్శకుడు గౌతమ్ తిన్ననూరి. చాలా రోజుల తరువాత టాలీవుడ్‌కి మంచి ఎమోషనల్ రైడ్ లాంటి చిత్రాన్ని అందించిన గౌతమ్ తిన్ననూరి దర్శకత్వ ప్రతిభపై ప్రశంసల జల్లు కురుస్తోంది. మళ్లీ రావా’ చిత్రంతో దర్శకుడిగా నిరూపించుకున్న గౌతమ్ తిన్ననూరి.. రెండో ప్రయత్నంలోనే జెర్సీ చిత్రంలో బ్లాక్ బస్టర్ హిట్ చిత్రాన్ని అందుకున్నారు. అయితే ఐటీ ఉద్యోగిగా కెరియర్ ప్రారంభించిన గౌతమ్ దర్శకుడు ఎలా అయ్యారో ఆయన మాటల్లోనే విందాం.. మాది రాజమండ్రి.. అక్కడే పుట్టా అక్కడే పెరిగా.. అక్కడే చదివా. ఇంజనీరింగ్ కూడా రాజమండ్రిలోనే చేశా. ఢిల్లీలో ఎంబీఏ చేశా. తరువాత బెంగుళూరు ఏక్సేంచర్‌లో బాబ్ జాయిన్ అయ్యా. దాని తరువాత హైదరాబాద్ డెలాయిట్‌లో జాబ్ చేశా. 2012లో డైరెక్టర్ కావడం కోసం నా జాబ్ వదిలేశా. నాకు సినిమాలు అంటే చిన్నప్పుడు ఇష్టం. పైగా నాకు రాయడం అంటే చాలా ఇష్టం. స్కూల్ డేస్ నుండి రాయడం అలవాటుగా చేసుకున్నా. అలాగని కవితలు, నవలలు రాసేవాడిని కాదు.. నా చుట్టు జరుగుతున్న సంఘటనలను పేపర్‌పై రాసేవాడు. 2015 వరకూ నాకు డైరెక్టర్ అవుతాననే నాకు తెలియదు.నా స్నేహితుడు ఒకరు సినిమా తీశారు. దానికి డైలాగ్స్, స్క్రిప్ట్ రాసేవాడిని. అప్పుడే టెక్నికల్ వర్క్ తెలుసుకున్నా. అప్పుడే నా దగ్గర ఉన్న స్టోరీలను మార్చుకున్నా. నాకు కథ చెప్పడం రాదు.. కాన్ఫిడెంట్‌గా కథ చెప్పలేను. ఎంత మంచి కథ అయినా చెప్పడం రాకపోతే ఆ కథ వేస్ట్. మొదట్లో నేనూ అలాంటి ప్రాబ్లమ్స్ చాలా ఫేస్ చేశా. నా స్నేహితుడు గిరీష్‌ని కూర్చోబెట్టి కథ చెప్పడం నేర్చుకున్నా. నాకు రాయడం కన్నా నెరేట్ చేయడం కష్టం అయ్యేది. అలా కథ చెప్పడం మొదలుపెట్టా’ అంటూ గౌతమ్ తిన్ననూరి ఐడీ ఉద్యోగి నుండి దర్శకుడిగా ఎలా మారారో చెప్పుకొచ్చారు