ఎయిర్‌టెల్‌కు చెందిన డైరెక్ట్ టు హోమ్ (డీటీహెచ్) సర్వీసుల సంస్థ ఎయిర్‌టెల్ డిజిటల్ టీవీ (ఎయిర్‌టెల్ డీటీహెచ్) తాజాగా మరో కొత్త ఛానల్‌ను అందుబాటులోకి తీసుకువచ్చింది. దీని పేరు స్పాట్‌లైట్ ఛానల్. ఇది ఒక వీడియో ఆన్ డిమాండ్ ఛానల్. దీని కోసం జీ థియేటర్‌తో భాగస్వామ్యం కుదుర్చుకుంది. జీ ఎంటర్‌టైన్‌మెంట్‌కు చెందిన థియేటర్ విభాగమే జీ థియేటర్. ఎయిర్‌టెల్ డీటీహెచ్ సబ్‌స్క్రైబర్లు కొత్త ఛానల్‌ను 191లో వీక్షించొచ్చు. ప్రతి సబ్‌స్క్రైబర్ ఈ ఛానల్‌ను ఉచితంగా పొందొచ్చు. అయితే కేవలం 10 రోజులు మాత్రమే ఈ సౌకర్యం ఉంటుంది. మీకు ఛానల్ నచ్చి, కొనసాగించాలనుకుంటే.. తర్వాత నెలకు రూ.75 చెల్లించాల్సి ఉంటుంది. రిజిస్టర్డ్ మొబైల్ నెంబర్ నుంచి మిస్డ్ కాల్ ఇచ్చి ఈ ఛానల్‌ను యాక్టివేట్ చేసుకోవచ్చు. లేదంటే యాప్, వెబ్‌సైట్‌లో లాగిన్ అయ్యి స్పాట్‌లైట్ ఛానల్ పొందొచ్చు. ట్రాయ్ కొత్త నిబంధనలతో ఇప్పటికే డీటీహెచ్ సబ్‌స్క్రైబర్ల నెలవారీ బిల్లు పెరిగింది. ఇప్పుడు ఈ కొత్త ఛానల్‌కు మళ్లీ నెలకు రూ.75 చెల్లించడమంటే కొంత ఇబ్బందిగానే ఉండొచ్చు. అయితే కొందరు చెల్లించేవారు కూడా ఉండొచ్చు.