జెర్సీ’ సినిమా కథ విన్నప్పుడే అద్భుతంగా అనిపించింది.. సినిమాలో అర్జున్‌కి బీసీసీఐ ఈవెంట్ ప్లాన్ చేసినట్టు.. దిల్ రాజు ‘జెర్సీ’ టీంకి అభినందన సభ ఏర్పాటు చేశారన్నారు నేచురల్ స్టార్ నాని. యువ టాలెంటెండ్ దర్శకుడు గౌతమ్ తిన్ననూరి దర్శకత్వంలో నాని, శ్రద్ధా శ్రీనాథ్ హీరో హీరోయిన్లుగా నటించిన ‘జెర్సీ’ చిత్రం గత శుక్రవారం విడుదలై అఖండ విజయాన్ని నమోదు చేసింది. ఈ సందర్భంగా హైదరాబాద్‌లో అభినందన సభ ఏర్పాటు చేశారు. ప్రముఖ నిర్మాత దిల్ రాజు అద్యక్షతన జరిగిన ఈ కార్యక్రమంలో నాని, శ్రద్ధా శ్రీనాథ్, గౌతమ్ తిన్ననూరి, చైల్డ్ ఆర్టిస్ట్‌గా సినిమాలో నానికి కొడుకుగా నటించిన తదితరులు పాల్గొన్నారు. ఈ సందర్భంగా నాని మాట్లాడుతూ.. ‘తెలుగు సినిమాకి దిల్ రాజు బీసీసీఐ లాంటి వారు. ఆయన ఈ కార్యక్రమాన్ని నిర్వహించడం చాలా ఆనందంగా ఉంది. ఏదైనా ఒక మంచి సినిమా వచ్చినప్పుడు ఉదయం 9 గంటల లోపు దిల్ రాజు దగ్గర నుండి కాల్ వస్తే మన సినిమా హిట్ అని. అలా జెర్సీ సినిమాకి కూడా ఉదయం 8.45కి దిల్ రాజు నుండి కాల్ వచ్చేసింది. అప్పుడు నాకు సినిమాపై ఓ క్లారిటీ వచ్చేసింది. ఈ సినిమా కథ విన్నప్పుడే నాకు అద్భుతంగా అనిపించింది. నేను ప్రీ రిలీజ్ ఈవెంట్‌లోనే నేను చాలా కాన్ఫిడెంట్‌గా ఈ సినిమా ప్రేక్షకులు గర్వపడేలా ఉంటుందని చెప్పా. ఈ ఈవెంట్‌లో నేను నా టీంకి థాంక్స్ చెప్తా. ముఖ్యంగా చిత్ర దర్శకుడు గౌతమ్‌ గురించి చెప్పాలంటే... కథలో ఎంత నిజాయితీ ఉంది అనేది ఆ మనిషితో ఓ ఐదు నిమిషాలు మాట్లాడితే సరిపోతుంది. నిజంగా మనసులో నుండి వచ్చిన కథ మ్యాజికల్ హిట్ అవుతుంది. అలా గౌతమ్ మనసులో నుండి వచ్చిన కథే ‘జెర్సీ’. ఈ సినిమా హిట్ అయ్యిందని చాలా మంది గౌతమ్‌ని పొగుడుతున్నారు. కాని ఈ సినిమా ప్రారంభం నుండి కూడా గౌతమ్ చాలా పెద్ద డైరెక్టర్ అవుతాడు. మన ఇండస్ట్రీ గర్వించే డైరెక్టర్ అవుతాడని మొదటి నుండి చెబుతూనే ఉన్నా. నాలో అర్జున్‌ని చూపించిన దర్శకుడికి థాంక్స్’ అన్నారు నేచురల్ స్టార్ నాని.