రాష్ట్రంలో వివిధ పథకాలపై ఏపీ సీఎస్ ఎల్వీ సుబ్రమణ్యం సమీక్ష నిర్వహించడాన్ని ఆర్థిక మంత్రి యనమల రామకృష్ణుడు తప్పుబట్టారు. పేదల పథకాలకు నిధుల విడుదలపై ప్రభుత్వ ప్రధాన కార్యదర్శి ప్రశ్నించడంపై యనమల మండిపడ్డారు. కొన్ని పథకాలకు బడ్జెట్‌లో నిధులు లేవని సీఎస్ పేర్కొన్నారని యనమల తెలిపారు. సీఎస్ చేసిన వ్యాఖ్యలపై అభ్యంతరం వ్యక్తం చేశారు. పసుపు - కుంకుమ, పింఛన్లు, రైతుల పెట్టుబడి సాయానికి బడ్జెట్‌లో తగిన కేటాయింపులు చేశామని చెప్పారు. అన్నదాత సుఖీభకు రూ.5000 కోట్లు, పసుపు-కుంకుమకు రూ.4000 కోట్లు బడ్జెట్‌లో కేటాయించామని యనమల తెలిపారు. పింఛన్ల కేటాయింపును బడ్జెట్‌లో స్పష్టంగా పేర్కొన్నామని వివరించారు. ఎన్నికల కోడ్‌ అమల్లోకి రాకముందే రైతులకు, మహిళలకు చెక్కులు పంపిణీ చేశామని తెలిపారు. బడ్జెట్లో ఉన్న ఈ పథకాలు ఎన్నికల కోడ్‌ కిందికి రావని యనమల తెలిపారు. ఇప్పటికే కోర్టులు కూడా ఈ విషయాన్ని స్పష్టం చేసిన అంశాన్ని గుర్తు చేశారు. అలాంటి పథకాలపై ప్రధాన కార్యదర్శి సమీక్ష నిర్వహించడం సరికాదన్నారు. సీఎస్ ఎల్వీ సుబ్రమణ్యం బుధవారం (ఏప్రిల్ 24) మధ్యాహ్నం అమరావతిలోని ఏపీ సచివాలయంలో ఉన్నతాధికారులతో సమీక్ష నిర్వహించారు. ఈ సమావేశంలో ప్రధానంగా మే 23న జరిగే కౌంటింగ్ ఏర్పాట్లపై సమీక్ష నిర్వహించినట్లు సమాచారం. సీఈవో గోపాలకృష్ణ ద్వివేది, హోమ్ శాఖ ముఖ్య కార్యదర్శి అనురాధ, డీజీపీ ఆర్పీ ఠాకూర్‌ తదితరులు ఈ సమీక్షకు హాజరయ్యారు. జిల్లాల నుంచి కలెక్టర్లు, ఎస్పీలు వీడియో కాన్ఫరెన్స్‌ ద్వారా పాల్గొన్నారు. స్ట్రాంగ్ రూమ్‌ల వద్ద భద్రతా ఏర్పాట్లు, కౌంటింగ్‌కు తీసుకోవాల్సిన ఏర్పాట్లపై చర్చించారు..అయితే.. సీఎస్ సుబ్రమణ్యం సమీక్ష నిర్వహించడాన్ని టీడీపీ నేతలు తప్పుబడుతున్నారు. ఎన్నికల నియమావళి అమలులో ఉన్న సమయంలో.. అధికారాలన్నీ ఈసీ చేతిలో ఉన్న సందర్భంలో ఆయన సమీక్ష ఎలా నిర్వహిస్తారని ప్రశ్నిస్తున్నారు. మరీ ముఖ్యంగా ఓట్ల లెక్కింపు లాంటి అంశాలపై సమీక్ష నిర్వహించాలంటే.. ఈసీ ప్రతినిధిగా రాష్ట్ర ఎన్నికల ప్రధానాధికారి ద్వివేదికి మాత్రమే అధికారాలు ఉంటాయని చెబుతున్నారు. కానీ, ఈ ప్రక్రియతో ఏమాత్రం సంబంధంలేని, అసలు ఎన్నికల విషయంలో జోక్యం చేసుకునే అధికారమే లేని సీఎస్.. సమీక్ష ఎలా నిర్వహిస్తారని ప్రశ్నిస్తున్నారు.