ఐపీఎల్ 2019 సీజన్‌కి ఊహించని ఎదురుదెబ్బ తగలబోతోంది. క్రికెట్ ప్రపంచంలోనే అత్యంత ఆదరణ పొందిన టోర్నీగా విరాజిల్లుతున్న ఐపీఎల్.. తాజా సీజన్‌లో మాత్రం ఆఖర్లో ఢీలాపడనుంది. మే 30 నుంచి వన్డే ప్రపంచకప్ ప్రారంభంకానున్న నేపథ్యంలో.. ఇంగ్లాండ్, ఆస్ట్రేలియా, దక్షిణాఫ్రికా క్రికెటర్లు మే నెల ఆరంభంలోనే స్వదేశానికి వచ్చేయాలని ఆయా దేశాల క్రికెట్ బోర్డులు ఆటగాళ్లని ఆదేశించాయి. దీంతో.. మరో వారంలో దాదాపు 18 మంది విదేశీ క్రికెటర్లు భారత్‌ని వీడనున్నారు. అయితే న్యూజిలాండ్ క్రికెటర్లు మాత్రం టోర్నీ ముగిసే వరకూ భారత్‌లోనే ఉండనుండగా.. వెస్టిండీస్, శ్రీలంక, అఫ్గానిస్థాన్ క్రికెట్ బోర్డుల నుంచి ఇప్పటి వరకూ ఎలాంటి ఆదేశాలు రాలేదు..! 

1. చెన్నై సూపర్ కింగ్స్ జట్టు నుంచి దక్షిణాఫ్రికా ఆటగాళ్లు డుప్లెసిస్, ఇమ్రాన్ తాహిర్ స్వదేశానికి వెళ్లనున్నారు. ఓపెనర్‌గా డుప్లెసిస్ జట్టుకి మెరుగైన ఆరంభాలు ఇస్తుండగా.. తాహిర్ పొదుపుగా బౌలింగ్‌ చేస్తూ కీలక సమయంలో వికెట్లు పడగొడుతూ చెన్నై విజయాల్లో క్రియాశీలక పాత్ర పోషిస్తున్నాడు. 

2. రాయల్ ఛాలెంజర్స్ బెంగళూరు టీమ్ నుంచి మొయిన్ అలీ, డేల్ స్టెయిన్, స్టాయినిస్, హెన్రిచ్ క్లాసెన్ వెళ్లనున్నారు. వారం క్రితమే బెంగళూరు టీమ్‌లోకి వచ్చిన స్టెయిన్.. ఆడిన రెండు మ్యాచ్‌ల్లోనూ కీలక వికెట్లు పడగొట్టి బెంగళూరుకి ఊహించని విజయాల్ని అందించాడు. ఇక మొయిన్ అలీ, స్టాయినిస్ మిడిలార్డర్‌లో మెరుపులు మెరిపిస్తున్నారు. క్లాసెన్ టోర్నీలో ఆడింది తక్కవే..! 

3. రాజస్థాన్ రాయల్స్జట్టు నుంచి జోస్ బట్లర్, బెన్‌స్టోక్స్, స్టీవ్‌స్మిత్, జోప్రా ఆర్చర్ స్వదేశానికి వెళ్లనున్నారు. బట్లర్ ఓపెనర్‌గా రాజస్థాన్‌కి మెరుపు ఆరంభాల్ని ఇస్తుండగా.. మిడిలార్డర్‌లో బెన్‌స్టోక్స్, స్టీవ్‌స్మిత్ జట్టుకి ప్రధాన బలం. ఇక రాజస్థాన్ బౌలింగ్‌ భారాన్ని ఆరంభం నుంచి ఆర్చరే ఎక్కువగా మోస్తున్నాడు.

4. సన్‌రైజర్స్ హైదరాబాద్ టీమ్ నుంచి డేవిడ్ వార్నర్, జానీ బెయిర్‌స్టో, షకీబ్ అల్ హసన్ వెళ్లనున్నారు. తాజా సీజన్‌లో హైదరాబాద్ ఓపెనర్లు వార్నర్, బెయిర్‌స్టో సూపర్ హిట్ జోడీగా నిలిచారు. ఇప్పటికే టోర్నీలో నాలుగు శతక భాగస్వామ్యాలు నెలకొల్పిన ఈ జోడీ.. హైదరాబాద్‌కి తిరుగులేని విజయాల్ని అందించింది. ఇక షకీబ్ అల్ హసన్.. తుది జట్టులో చోటు కూడా దక్కించుకోలేకపోతున్నాడు. 

5. ముంబయి ఇండియన్స్ టీమ్ నుంచి జాసన్ బెరండ్రాఫ్, డికాక్‌ వెళ్లనున్నారు. ఓపెనర్‌గా డికాక్ ఆరంభం నుంచి నిలకడగా రాణిస్తుండగా.. బెరండ్రాఫ్ తన బౌలింగ్‌తో జట్టులో నమ్మదగిన బౌలర్‌గా పేరు దక్కించుకున్నాడు. 

6. కింగ్స్ ఎలెవన్ పంజాబ్ జట్టు నుంచి డేవిడ్ మిల్లర్ వెళ్లనున్నాడు. మిడిలార్డర్‌లో ప్రధాన బ్యాట్స్‌మెన్‌గా ఉన్న మిల్లర్.. టీమ్‌లోనే నెం.1 ఫీల్డర్‌గా ఎన్నోసార్లు ప్రశంసలు అందుకున్నాడు. 

7. ఢిల్లీ క్యాపిటల్స్ జట్టు నుంచి కగిసో రబాడ వెళ్లనున్నాడు. తాజా సీజన్‌లో అత్యధిక వికెట్లు పడగొట్టిన బౌలర్‌గా ఉన్న రబాడ.. ఢిల్లీ జట్టుకి అసాధారణ విజయాల్ని అందించాడు. 

8. కోల్‌కతా నైట్‌రైడర్స్ జట్టు నుంచి జో డెన్లీ వెళ్లనున్నాడు. అయితే.. అతను వెళ్లడం వల్ల కోల్‌కతాపై పెద్దగా ప్రభావం చూపకపోవచ్చు.