దర్శకధీరుడు ఎస్.ఎస్.రాజమౌళి తెరకెక్కిస్తోన్న మల్టీస్టారర్ ‘ఆర్ ఆర్ ఆర్’పై రోజుకో వార్త వినిపిస్తోంది. సినిమా మొదలైనప్పటి నుంచి ఏదో ఒక రకంగా వార్తల్లో నిలుస్తోంది. ఈ సినిమా గురించి ఏ చిన్న అప్‌డేట్ వచ్చినా అది వైరల్‌గా మారుతోంది. ఇప్పటికే రెండు షెడ్యూల్‌లు పూర్తిచేసుకున్న ఈ సినిమా మూడో షెడ్యూల్‌కు సిద్ధమవుతోంది. రెండో షెడ్యూల్‌లో భాగంగా జిమ్‌లో వర్కౌట్స్ చేస్తుండగా రామ్ చరణ్ గాయపడిన సంగతి తెలిసిందే. ఆయన కాలి చీలమండకు గాయం కావడంతో షూటింగ్‌ను మూడు వారాలపాటు వాయిదా వేశారు. అయితే, తాజాగా ఎన్టీఆర్ కూడా గాయపడినట్లు వార్తలు వస్తున్నాయి. ఎన్టీఆర్ కుడిచేతి మణికట్టుకు గాయమైందని, హాస్పిటల్‌కు వెళ్లి చికిత్స కూడా పొందుతున్నారని అంటున్నారు. ఎన్టీఆర్ ఓ ప్రైవేటు హాస్పిటల్ నుంచి బయటికి వచ్చి కారులోకి ఎక్కుతోన్న దృశ్యాలు ఇవిగో అంటూ కొన్ని ఫొటోలు సోషల్ మీడియాలో వైరల్ అవుతున్నాయి. ఈ ఫొటోల్లో ఎన్టీఆర్ చేతికి బ్యాండ్ ఉండటం, చేతిని ఆయన చాలా జాగ్రత్తగా చూసుకోవడం స్పష్టమవుతోంది. అయితే, ఈ గాయం పెద్దదేమీ కాదని పరిశ్రమ వర్గాలు అంటున్నాయి. గాయం నుంచి కోలుకోగానే రామ్ చరణ్, ఎన్టీఆర్ షూటింగ్‌లో పాల్గొంటారని చెబుతున్నారు. ఇంతకీ ఈ గాయం ఎలా అయ్యింది అనే విషయంలో మాత్రం స్పష్టత లేదు. షూటింగ్‌లో భాగంగా జరిగిందా, అనుకోకుండా ఏదైనా ప్రమాదం చోటుచేసుకుందా అనే విషయాలు తెలియాల్సి ఉంది. ఇదిలా ఉంటే, ఎన్టీఆర్‌కు చేతికి గాయమైందనే వార్త సోషల్ మీడియాలో వైరల్ కావడంతో ఆయన అభిమానులు ఆందోళనకు గురవుతున్నారు. తారక్ అన్న త్వరగా కోలుకోవాలి అంటూ కామెంట్లు పెడుతున్నారు. ‘ఆర్ ఆర్ ఆర్’లో అల్లూరి సీతారామరాజు, కొమరం భీమ్ వంటి సమవుజ్జీవులైన స్వాతంత్య్ర సమరయోధుల పాత్రలు పోషిస్తోన్న రామ్ చరణ్, ఎన్టీఆర్.. ఒకేసారి గాయపడటం గమనార్హం.