లక్ష్మీస్ ఎన్టీఆర్’ చిత్రంతో తెలుగు రాష్ట్రాల్లో ఉత్కంఠకు తెరతీశారు వర్మ. సినిమా మొదలైంది మొదలు రిలీజ్ తరువాత కూడా అనేకనేక వివాదాలకు, విమర్శలకు తావిచ్చిన వర్మ ‘లక్ష్మీ ఎన్టీఆర్’ చిత్రం ఎట్టకేలకు ఏపీలో విడుదలకు లైన్ క్లియర్ అయ్యింది. కోర్టు స్టేలు.. తెలుగు తమ్ముళ్ల నిరసనలతో వాయిదాల మీద వాయిదాలు పడుతూ ప్రపంచం మొత్తం చూసిన ఈ సినిమాను కేవలం ఆంధ్రప్రదేశ్ ప్రేక్షకులు మాత్రమే వీక్షించలేకపోయారు. ఏపీలో ఎన్నికల నేపథ్యంలో ఎన్నికల కోడ్ అమలులో ఉండటం వల్ల.. ఈ సినిమాలో చంద్రబాబుని విలన్‌గా చూపించడం వల్ల ఆ ప్రభావం ఓటర్లపై పడే అవకాశం ఉండటంతో కోర్టు ఆదేశాల మేరకు ఈ సినిమా ఒక్క ఆంధ్రప్రదేశ్‌ మినహా.. మిగతా అన్ని ప్రాంతాల్లోనూ మార్చి 29న విడుదలై పాజిటివ్ రెస్పాన్స్ రాబట్టింది. వర్మ మార్క్ డైరెక్షన్‌తో పాటు ఆయన మార్క్ పబ్లిసిటీ తోడు కావడంతో ఈ సినిమాపై విపరీతమైన హైప్ ఏర్పడి మంచి వసూళ్లను రాబట్టింది. ఇక ఈ సినిమాకు విడుదలకు అవాంతరాలు తొలగిపోవడంతో మే 1న ఏపీలో భారీగా విడుదల కానుంది. ‘ఎన్టీఆర్‌ అనుభవించిన నరకం ఏపీ ప్రజలు తెలుసుకోబోతున్నారంటూ’ ట్విటర్‌లో విడుదల తేదీని ప్రకటించారు వర్మ. అయితే ‘లక్ష్మీస్ ఎన్టీఆర్’ చిత్రం వర్మ చెప్పినట్టుగా.. ఎన్టీఆర్ అసలు కథ అన్నప్పటికీ ఈ చిత్రం చూసిన తరువాత చంద్రబాబును వెన్నుపోటు దారుడిగా చూపించడం కోసమే ఈ సినిమా అన్నది దాచలేని నిజం. ఇందులో వాస్తవం ఎంత అన్న విషయాన్ని పక్కనపెట్టేస్తే వర్మ చెప్పాల్సిన విషయాన్ని సూటిగా సుత్తిలేకుండా చెప్పేశారు. అయితే ఈ సినిమా ఎన్నికల ముందు ఏపీలో విడుదలైతే తెలుగుతమ్ముళ్లు భయపడినట్టుగానే ఎంతో కొంత ప్రభావం ఉండేది. ఎందుకంటే కొన్ని సీన్లను వర్మ వాస్తవ పరిస్థితుల ఆధారంగా నమ్మశక్యంగా చిత్రీకరించడంతో సక్సెస్ అయ్యారు. ఆయన చూపించిన వాటిని అవాస్తవం అని వాధించే వారు.. ఏది వాస్తవమో చెప్పలేని పరిస్థితి. ఎందుకంటే నాడు ఎన్టీఆర్ మానసిక క్షోభను అనుభవించిన మాట వాస్తవం.. ఆయనపై చెప్పులు విసిరింది వాస్తవం.. ఆయన్ని వెన్నుపోటు పొడవటం వాస్తవం. వీటికి చరిత్రక ఆధారాలతో పాటు స్వయం ఎన్టీరామారావే తన క్షోభకు కారమైన వ్యక్తుల గురించి బహిరంగంగా చెప్పడంతో ఆ సీన్లను రక్తికట్టించారు వర్మ. అదే సందర్భంలో వర్మ ‘లక్ష్మీస్ ఎన్టీఆర్’ చిత్ర రూపకల్పన రాజకీయ లబ్ధికోసం అన్నది కూడా వాస్తవమే. అయితే వర్మ భావించినట్టుగా ఈ సినిమా ఎన్నికల ముందు రిలీజ్ అయితే వర్మ ఎవరికైతే లబ్ధి చేకూర్చాలని ఈ సినిమా తీశారో వారికి ఎంతో కొంత ప్రయోజనం ఉండేది. అయితే ఎన్నికల తరువాత ఈ సినిమాను విడుదల చేయడం వల్ల పెద్దగా రాజకీయ ప్రయోజనం లేకపోవచ్చు.ఇకపోతే.. పోనీ కలెక్షన్లు కుమ్మేస్తాయి.. నిర్మాతలకు కాసులు కురిపిస్తుంది అనుకుంటే అదీ లేదు. ఎందుకంటే ‘లక్ష్మీస్ ఎన్టీఆర్’ తెలంగాణతో పాటు మిగిలిన ప్రాంతాల్లోనూ విడుదలై దాదాపు నెలకావోస్తోంది. ఇప్పటికే ఈ సినిమాను థియేటర్స్‌లోనే కాకుండా ఆన్ లైన్‌లోనూ చాలా మంది చూశారు. పక్కరాష్ట్రంలో విడుదలైన సినిమా ఏపీలో విడుదల కాకపోవడంతో పనికట్టుకుని మరీ ఈ సినిమాను నెట్‌లో లీక్ చేసి ఏపీ ప్రజలకు చేరువయ్యేలా ఓ వర్గం గట్టిగానే ప్రయత్నం చేసింది. వీరికి తోడు తమిళ్ రాకర్స్ లాంటి వెబ్ సైట్ విడుదల రోజునే హెచ్ డీ ఫ్రింట్‌తో ‘లక్ష్మీస్ ఎన్టీఆర్’ ఆన్ లైన్‌లో పెట్టేసింది. ఇవేకాకుండా ప్రస్తుతం తెలుగు రాష్ట్రాల్లో థియేటర్స్ ప్రేక్షకులతో కళకళలాడుతున్నాయి. మజిలీ, జెర్సీ, చిత్రలహరి చిత్రాలతో పాటు అవేంజర్ సినిమాలు సక్సెస్ ఫుల్‌గా రన్ అవుతున్నాయి. ఈ తరుణంలో ఈ నాలుగు చిత్రాలను కాదని ‘లక్ష్మీస్ ఎన్టీఆర్’ చిత్రంవైపు ఏపీ ప్రేక్షకులు మొగ్గు చూపిస్తారా అంటే అనుమానమే.