ఏపీ ఎన్నికల నేపథ్యంలో ‘జబర్దస్త్’ కామెడీ షోకి దూరమయ్యారు నగరి వైఎస్ఆర్సీపీ ఎమ్మెల్యే రోజా. ఆయనతో పాటు మరో జడ్జ్‌గా వ్యవహరిస్తున్న నాగబాబు కూడా జనసేన తరుపున నరసాపురం ఎంపీ అభ్యర్థిగా బరిలోకి దిగటంతో ఈ ఇద్దరూ నాలుగు వారాల పాటు జబర్దస్త్‌లో కనిపించలేదు. సీనియర్ హీరోయిన్ మీనా, జానీ మాస్టర్, శేఖర్ మాస్టర్‌లతో భర్తీ చేసేందుకు ప్రయత్నించినా.. రోజా, నాగబాబుల జబర్దస్త్‌కి ఆస్థాన న్యాయ నిర్ణేతలుగా ఉండటంతో పాటు బుల్లితెర ప్రేక్షకులకు అలవాటుగా మారడంతో రోజా, నాగబాబులు లేకపోవడం లోటుగానే కనిపించింది. ఇక ఎన్నికల సంగ్రామం ముగిసింది. రోజా, నాగబాబులు ఎంపీ, ఎమ్మెల్యే సీట్లను భర్తీ చేస్తారో లేదో తెలియదుకాని జబర్దస్త్‌ షోలో జడ్జ్ సీట్లను మాత్రం తిరిగి భర్తీ చేసేందుకు రెడీ అయ్యారు. నాగబాబు ఎన్నికలు ముగిసిన తరువాత లైవ్‌లోకి వచ్చిమరీ.. ఎట్టి పరిస్థితుల్లోనూ జబర్దస్త్ షోను వదలని తేల్చిచెప్పగా.. రోజా అయితే రీ ఎంట్రీ ప్రోమోతో సందడి చేస్తుంది. అయితే రోజా జబర్దస్త్ రీ ఎంట్రీతో రాజకీయ వర్గాల్లో ఆసక్తికరమైన చర్చ నడుస్తోంది. ఏపీలో ఎన్నికలు ముగిసిన తరువాత చాలా సర్వేలతో పాటు రాజకీయ విశ్లేషకులు ఈసారి జగన్ సీఎం కాబోతున్నారంటూ జోస్యం చెబుతున్నారు. వైసీపీ శ్రేణులైతే తమ పార్టీ అధికారం రావడం ఖాయం.. జగన్ ముఖ్యమంత్రి ఖాయం అంటూ ధీమాగా చెబుతున్నారు. 

ఇక వైసీపీ అధికారంలోకి వస్తే.. జగన్ ముఖ్యమంత్రి కావడం ఎంత నిజమో.. వైసీపీ ఫైర్ బ్రాండ్ రోజా మంత్రి కావడం కూడా అంతే నిజం అంటూ వార్తలు వస్తున్నాయి. అసెంబ్లీలో పార్టీ తరుపున వాయిస్ వినిపించడమే కాకుండా అధికార ప్రభుత్వాన్ని తన మాటల తూటాలతో ఇరుకున పెడుతూ వైసీపీ ఫైర్ బ్రాండ్‌గా మారిన రోజా.. రెండో సారి నగరి నుండి విజయం సాధించడం ఖాయమే అంటూ నిన్న మొన్నటి వరకూ వార్తలు వినిపించాయి. అయితే ఆమె జబర్దస్త్ రీ ఎంట్రీ తరువాత కొత్త చర్చలు మొదలయ్యాయి. వైసీపీ అధికారంలోకి వస్తుందా? రాదా అన్నది తరువాత విషయం కాని.. నగరిలో రోజా గెలుపు అనుకున్నంత ఈజీ కాదంటున్నారు. నగరిలో రోజాపై గాలి ముద్దు క్రిష్ణమనాయుడు కొడుకు భాను ప్రకాష్ పోటీ చేయడం పాటు.. గత ఎన్నికల్లో కేవలం ప్రత్యర్ధిపై 700 ఓట్ల తేడాతో గెలిచారు రోజా. ఇక ఈ ఎన్నికల్లో ఎలాగైనా నగరిలో రోజాని ఓడించడానికి టీడీపీ అధిష్టానం కూడా నగరిపై ప్రత్యేక దృష్టి పెట్టడంతో రోజా గెలుపు కష్టంగా మారింది. అయితే నగరి నియోజక వర్గంలో తమిళ ఓటర్ల ప్రభావం ఎక్కువగా ఉండటం.. రోజా భర్త తమిళుడే కావడం రోజాకి కలిసివచ్చే అంశం. అయితే రోజా బబర్దస్త్ రీ ఎంట్రీ తరువాత కొత్త ప్రచారం ఏంటంటే.. నగరి గెలుపుపై రోజా కాన్ఫిడెంట్‌గా లేరని.. పైగా వైసీపీ అధికారంలోకి వచ్చినా మంత్రి పదవి కూడా డౌటే అని గుసగుసలు వినిపిస్తుండటంతో ఎందుకైనా మంచిదని జబర్దస్త్‌ని సేఫ్‌లో పెట్టుకుందట రోజా. ఇదే విషయాన్ని వైసీపీ శ్రేణులతో ముచ్చటిస్తే.. ఊరుకోండి బాస్.. రోజా నగరిలో వైసీపీ జెండా పాతేయడం ఖాయం. జబర్దస్త్‌గా మంత్రి కావడం పక్కా అంటూ బల్లగుద్ది మరీ చెబుతున్నారు.