మహారాష్ట్ర ఆవిర్భావ దినోత్సవం రోజున మావోలు పంజా విప్పారు. గడ్చిరోలి జిల్లాలో భద్రతా సిబ్బంది ప్రయాణిస్తోన్న వాహనాన్ని లక్ష్యంగా చేసుకొని మందుపాతర పేల్చారు. ఈ ఘటనలో డ్రైవర్‌తోపాటు 15 మంది పోలీస్ కమాండోలు దుర్మరణం చెందారు. పేలుడు ధాటికి పోలీసు వాహనం తునాతునకలైంది. జముర్‌ఖేడా సమీపంలోని కుర్ఖేడాలో బుధవారం ఈ ఘటన చోటు చేసుకుంది. ప్రమాదం జరిగిన సమయంలో 16 మంది కమాండోలు ప్రయాణిస్తున్నారని సమాచారం. మందుపాతర పేల్చిన ప్రాంతంలో పోలీసులు, నక్సల్స్ మధ్య కాల్పులు జరుగుతున్నాయి. ఈ ప్రాంతంలో దాదాపు 200 మంది మావోయిస్టులు ఉన్నారని భావిస్తున్నారు. ఆ ప్రాంతాన్ని భద్రతా దళాలు జల్లెడపడుతున్నాయి. మంగళవారం రాత్రి గడ్చిరోలి జిల్లాలోని పురాడాలో నిర్మాణాలు జరుగుతోన్న ప్రాంతంలో 36 మెషిన్లు, వాహనాలను మావోలు తగలబెట్టారు. మహారాష్ట్ర పోలీస్ కమాండోలతో కూడిన క్విక్ రెస్పాన్స్ టీం ప్రయివేట్ వాహనంలో ఈ ప్రాంతానికి వెళ్తుండగా.. మావోలు పక్కా ప్లాన్‌తో పేల్చేశారు. బుధవారం మధ్యాహ్నం 12.30 గంటలకు ఈ ఘటన చోటు చేసుకుంది. గడ్చిరోలిలో భద్రతా దళాల సిబ్బందిని మావోలు పొట్టనబెట్టుకోవడాన్ని ప్రధాని మోదీ తీవ్రంగా ఖండించారు. అమరుల త్యాగాలను దేశం మర్చిపోదన్నారు. అమరుల కుటుంబాలకు ప్రగాఢ సానుభూతి తెలిపారు. ఈ దారుణానికి పాల్పడిన వారిని వదలబోమన్నారు

వీరజవాన్లకు సెల్యూట్

మహారాష్ట్రలోని గడ్చిరోలి జిల్లాలో ఈరోజు మావోయిస్టులు భద్రతాబలగాల కాన్వాయ్ లక్ష్యంగా ఐఈడీ పేల్చిన సంగతి తెలిసిందే. ఈ దుర్ఘటనలో డ్రైవర్ సహా 16 మంది భద్రతాసిబ్బంది ప్రాణాలు కోల్పోయారు. ఈ ఘటనను ఏపీ ఐటీ శాఖ మంత్రి, టీడీపీ నేత నారా లోకేశ్ ఖండించారు. ఈ దుర్ఘటనలో ప్రాణాలు కోల్పోయిన వీర జవాన్లకు నివాళులు అర్పించారు. లోకేశ్ ట్విట్టర్ లో స్పందిస్తూ..‘గడ్చిరోలిలో సీ-60 కమాండోలు లక్ష్యంగా మావోయిస్టులు జరిపిన క్రూరమైన దాడిని ఖండిస్తున్నా. హింస కారణంగా ఇప్పటివరకూ ఎవరూ దేన్నీ సాధించలేకపోయారు. ఈ ఘటనలో ప్రాణాలు కోల్పోయిన వీర జవాన్లకు సెల్యూట్ చేస్తున్నా. అమరులైన జవాన్ల కుటుంబాలతో మిగతా దేశ ప్రజలతో కలిసి ప్రగాఢ సానుభూతిని తెలియజేస్తున్నా’ అని ట్వీట్ చేశారు. మరోవైపు ఈ రోజు ఐఈడీ పేల్చిన మావోలను పట్టుకునేందుకు బలగాలు కూంబింగ్ ను ముమ్మరం చేశాయి.