బంగాళాఖాతంలో ఏర్పడిన తుఫాన్ ‘ఫణి‌’ తీవ్రత అంతకంతకూ పెరుగుతోంది. పెను తుఫాన్‌గా మారింది. దీని ప్రభావంతో సముద్రం అల్లకల్లోలంగా మారింది. సుమారు 15 నుంచి 18 అడుగుల మేర అలలు ఎగసిపడుతున్నాయి. ఫణి ప్రభావంతో ఉత్తరాంధ్రతో పాటు పలు జిల్లాల్లో భారీ నుంచి అతి భారీ వర్షాలు కురిసే అవకాశం ఉన్నట్లు అధికారులు తెలిపారు. తుఫాన్ తీరం దాటే సమయంలో బలమైన గాలులు బీభత్సం చేసే ప్రమాదం ఉన్నట్లు హెచ్చరించారు. గంటకు 150 నుంచి 185 కి.మీ. వేగంతో ప్రచండ గాలులు విరుచుకుపడే అవకాశం ఉందని తెలిపారు. సాధారణంగా తుఫాన్‌లు తీరం దాటే సమయంలో గంటకు 70 నుంచి 80 కి.మీ. వేగంతో గాలులు వీస్తాయి. కాస్త భారీ తుఫాన్లు అయితే.. గంటకు 120 కి.మీ. వరకు గాలులు వీస్తాయి. కానీ, ఫణి ప్రభావంతో గంటకు 180 కి.మీ. వేగంతో గాలులు వీస్తాయంటే.. తుఫాన్ చేసే బీభత్సాన్ని అర్థం చేసుకోవచ్చు. హుద్ హుద్ తుఫాన్ కంటే తీవ్రమైన బీభత్సం చేసే ప్రమాదం పొంచి ఉన్న నేపథ్యంలో ప్రజలు వణికిపోతున్నారు. ఫణి తుఫాన్‌ తీవ్ర విధ్వంసం చేయనున్న వార్తలతో అధికారులు అప్రమత్తమయ్యారు. సహాయ కార్యక్రమాలకు విశాఖ కేంద్రంగా అన్ని విధాలుగా సిద్ధంగా ఉన్నట్లు ఇండియన్ నేవీ అధికారులు వెల్లడించారు. అటు ఎన్డీఆర్ సిబ్బంది కూడా తగిన ఏర్పాట్లతో సిద్ధంగా ఉన్నారు. సముద్రంలో చేపల వేటకు వెళ్లొద్దని మత్స్యకారులను హెచ్చరించారు. బీచ్‌లో పర్యాటకులకు అధికారులు అనుమతి నిరాకరించారు. గజ ఈతగాళ్లను అందుబాటులో ఉంచడంతో పాటు తీర ప్రాంతాల్లో పునరావాస కేంద్రాలను సిద్ధం చేశారు. ఫణి తుఫాన్ నేపథ్యంలో తూర్పు కోస్తా రైల్వే కూడా అప్రమత్తమైంది. శ్రీకాకుళం, విజయనగరం, విశాఖ రైల్వేస్టేషన్లలో సహాయ కేంద్రాలు ఏర్పాటు చేసింది. అటు తుఫాన్ ప్రభావం తీవ్రంగా ఉన్న ఒడిషాలో హై అలర్ట్ విధించారు. రాష్ట్రంలోని అత్యధిక జిల్లాల్లో ఎన్నికల కోడ్ ఎత్తివేశారు.తుఫాన్ ప్రభావంపై ఏపీ సీఎస్ ఎల్వీ సుబ్రమణ్యం జిల్లా కలెక్టర్లతో వీడియో కాన్ఫరెన్స్‌ నిర్వహించారు. జిల్లా యంత్రాంగం పూర్తి అప్రమత్తంగా ఉండాలని ఆయన ఆదేశించారు. విద్యుత్‌ స్తంభాలు నేలకొరిగితే వెంటనే పునరుద్ధరణ చేపట్టేందుకు వీలుగా 6 వేల స్తంభాలను సిద్ధం చేశారు. సహాయక చర్యల కోసం ఎన్డీఆర్‌ఎఫ్‌, ఎస్డీఆర్‌ఎఫ్‌, డీడీఆర్‌ఎఫ్‌ బృందాలతో పాటు 32 బోట్‌ టీమ్‌లను సిద్ధంగా ఉంచారు. తుఫాన్ ఫణి ప్రభావంతో పశ్చిమ గోదావరి జిల్లా కొయ్యలగూడెంలో ఈదురుగాలులతో కూడిన వర్షం బీభత్సం చేసింది. పలు చోట్ల విద్యుత్ స్తంభాలు, చెట్లు నేలకొరిగాయి. మామిడి పంటకు తీవ్ర నష్టం వాటిల్లింది. మే 3న మధ్యాహ్నం ఒడిశాలోని గోపాల్‌పూర్‌ - చాంద్‌బలి మధ్య తుఫాన్ తీరం దాటే అవకాశం ఉన్నట్టు అధికారులు తెలిపారు.