తీరం వైపు దూసుకొస్తోన్న సైక్లోణ్ ఫణి.. పెను తుఫాన్‌గా తీరం దాటనుంది. సాధారణంగా తుఫాన్లు తీరం దాటే సమయంలో గంటకు 70-80 కి.మీ. వేగంతో గాలులు వీస్తాయి. కానీ ఫణి ప్రభావంతో గంటకు 180 కి.మీ. వేగంతో గాలులు వీస్తాయని వాతావరణ శాఖ అంచనా వేస్తోంది. దీంతో హుదూద్ కంటే భారీ నష్టాన్ని సైక్లోన్ ఫణి కలిగించొచ్చనే ఆందోళన వ్యక్తం అవుతోంది. ఇప్పటికే సముద్ర అలలు భారీగా ఎగిసి పడుతుండటంతో మత్స్యకారులు వేటకు వెళ్లకుండా ఆదేశాలు జారీ అయ్యాయి. ఇప్పటికే తీర ప్రాంతాల్లో బలంగా గాలులు వీస్తున్నాయి. శుక్రవారం ఒడిశాలోని గోపాల్‌పూర్‌ - చాంద్‌బలి మధ్య తుఫాన్ తీరం దాటుతుందని అంచనా వేస్తున్నారు. ‘ఫణి’ ప్రభావం పొరుగున ఉన్న ఆంధ్రప్రదేశ్‌పై కూడా ఎక్కువగా ఉండనుంది. బలంగా గాలులు వీయడంతోపాటు భారీ వర్షాలు కురుస్తాయని వాతావరణ శాఖ వెల్లడించింది. ఉత్తరాంధ్ర, గోదావరి జిల్లాల్లో వర్షాలు ఎక్కువగా కురవనున్నాయి. శ్రీకాకుళం జిల్లాలో గంటకు 120 కి.మీ. వేగంతో గాలులు వీచే అవకాశం ఉంది. ఈ నేపథ్యంలో తుఫాన్ సమయంలో ఏయే జాగ్రత్తలు తీసుకోవాలి, ఏం పనులు చేయకూడదో తెలుసుకుందాం.. 

తుఫాన్ తీరం దాటడానికి ముందు.. 

రూమర్లను నమ్మొద్దు, ప్రశాంతంగా ఉండాలి. ముందు జాగ్రత్తగా ఫోన్లను ఫుల్‌గా ఛార్జింగ్ పెట్టుకోవాలి. రేడియో, టీవీల ద్వారా ఎప్పటికప్పుడు తుఫాన్‌కు సంబంధించిన సమాచారాన్ని తెలుసుకోవాలి. ముఖ్యమైన డాక్యుమెంట్ల తడిచిపోకుండా జాగ్రత్తగా దాచిపెట్టుకోవాలి. పదునైన వస్తువులను ఎక్కడపడితే అక్కడ పడేయొద్దు. జంతువులను తాళ్లతో కట్టేయకుండా వదిలేయాలి. ఎమర్జెన్సీ కిట్‌ను ముందే సిద్ధం చేసుకోవాలి. నిల్వ ఉండే ఆహారాన్ని సిద్ధం చేసుకోవాలి. బ్యాటరీలతో పని చేసే టార్చిలైట్లను దగ్గర ఉంచుకోవాలి.

ఎలక్ట్రిక్ మెయిన్ స్విచ్ఛాఫ్ చేయాలి. గ్యాస్ స్టవ్ పైప్‌ కూడా కట్టేయాలి. తుఫాన్ గాలులు ఇబ్బంది పెట్టకుండా ఇంటి తలుపులు, కిటికీలను మూసేయాలి. ఇల్లు పాతదైతే వెంటనే దాన్ని ఖాళీ చేసి తుఫాన్ షెల్టర్లలో ఆశ్రయం పొందాలి. కాచి చల్లార్చిన నీటిని మాత్రమే తాగాలి. రేడియో ద్వారా వార్తలు తెలుకుంటుండాలి. అధికారిక హెచ్చరికలను మాత్రమే విశ్వసించాలి. పాములు ఇంట్లోకి ప్రవేశించే అవకాశం ఉందని గుర్తుంచుకోవాలి. 

బయటకెళ్లినవారు.. 

అత్యవసర పనుల మీద బయటకు వెళ్లిన వారు దెబ్బతిన ఇళ్లు, భవనాల్లోకి వెళ్లొద్దు. నేలకూలిన విద్యుత్ స్తంభాలు, ఎలక్ట్రిక్ వైర్లు.. పదునైన వస్తువుల విషయంలో జాగ్రత్తగా ఉండాలి. సాధ్యమైనంత త్వరగా షెల్టర్ పొందాలి. మత్స్యకారులు సముద్రంలో వేటకు వెళ్లొద్దు. పడవలు, వలలను తీరానికి దూరంగా తీసుకెళ్లి జాగ్రత్తపర్చుకోవాలి. ఎక్స్‌ట్రా బ్యాటరీలను దగ్గర ఉంచుకొని రేడియోలో వాతావరణానికి సంబంధించిన రెగ్యులర్ అప్‌డేట్స్ తెలుసుకుంటుండాలి.