పట్టాభిషేకానికి నాలుగు రోజుల ముందు థాయ్‌ రాజు మహా వజిరలాంగ్‌కోర్న్ థాయ్‌‌లాండ్ దేశ ప్రజలను ఆశ్చర్యపరిచే నిర్ణయం తీసుకున్నారు. తన వ్యక్తిగత బాడీగార్డ్ విభాగానికి డిప్యూటీ చీఫ్‌గా వ్యవహరిస్తోన్న సుథిదను పెళ్లాడారు. అంతేకాదు ఆమెకు రాణి హోదాను కట్టబెట్టారు. థాయ్ రాజు బాడీగార్డ్ డిప్యూటీ చీఫ్‌ను పెళ్లాడిన వార్తను ‘రాయల్ గెజిట్‌’ ద్వారా వెల్లడించారు. బుధవారం వీరి పెళ్లి జరగ్గా.. థాయ్ టీవీ ఛానెళ్లు వివాహ వీడియోను ప్రసారం చేశాయి. 66 ఏళ్ల వజిరలాంగ్‌కోర్న్‌ను పదో రామా రాజుగా కూడా పిలుస్తారు. ఆయన తండ్రి, తొమ్మిదో రామా భుమిబోల్ అడుల్యడేజ్ 70 ఏళ్లపాటు సింహాసనాన్ని అధిష్టించారు. 2016 అక్టోబర్‌లో ఆయన మరణం తర్వాత వజిరలాంగ్‌కోర్న్ రాజయ్యారు. థాయ్ సంప్రదాయం ప్రకారం చనిపోయిన ఏడాది తర్వాత భుమిబోల్ అంత్యక్రియలు నిర్వహించారు. సంతాప దినాలు ముగిశాక మే 4న ఆయనకు పట్టాభిషేకం నిర్వహిస్తున్నారు. థాయ్ ఎయిర్‌వేస్‌లో పని చేసిన సుథిద తిడ్జాయ్‌ను 2014లో వజిరలాంగ్‌కోర్న్ తన బాడీగార్డ్ విభాగంలో చేర్చుకున్నారు. సుథిద, రాజు మధ్య ప్రేమ వ్యవహారం నడుస్తోందని రాజకుటుంబానికి దగ్గరగా ఉండే కొందరు వ్యక్తులు, విదేశీ మీడియా గతంలోనే తెలిపింది. కానీ ఆ వార్తలను ప్యాలెస్ కొట్టిపారేసింది. 2016 డిసెంబర్లో రాయల్ థాయ్ ఆర్మీలో సుథిదకు పూర్తి స్థాయి జనరల్ హోదాను రాజు కల్పించారు. 2017లో తన పర్సనల్ గార్డ్ డిప్యూటీ కమాండర్ హోదాను కట్టబెట్టారు. థాయ్ రాజు వజిరలాంగ్‌కోర్న్‌ గతంలో మూడు పెళ్లిళ్లు చేసుకొని విడాకులు తీసుకున్నారు. ఆయనకు ఏడుగురు సంతానం ఉన్నారు.