చంద్రబాబు నివాస సమీపంలో అగ్నిప్రమాదం కలకలం రేపింది. ఉండవల్లిలోని ముఖ్యమంత్రి నివాసానికి సమీపంలోని కరకట్ట పక్కనే శుక్రవారం (మే 3) ఉదయం మంటలు చెలరేగాయి. అక్కడి ఎండు గడ్డి తగలబడి పొలాల్లోకి ఒక్కసారిగా మంటలు వ్యాపించాయి. భద్రతా సిబ్బంది వెంటనే అప్రమత్తమయ్యారు. సమాచారం అందుకున్న అగ్నిమాపక సిబ్బంది.. ఘటనా స్థలికి వచ్చి మంటలను ఆర్పే ప్రయత్నం చేస్తున్నారు. ప్రమాదం ఎలా జరిగిందనే అంశంపై అధికారులు ఆరా తీస్తున్నారు. సీఎం చంద్రబాబు ఫణి తుఫాన్‌పై అధికారులతో సమీక్ష నిర్వహిస్తూ.. ఎప్పటికప్పుడు వివరాలు సేకరిస్తున్నారు. ప్రభుత్వ యంత్రాంగాన్ని అప్రమత్తం చేస్తున్నారు. ఆర్టీజీఎస్ ద్వారా విజయనగరం, శ్రీకాకుళం జిల్లాల్లో తుఫాన్ ప్రభావాన్ని అంచనా వేస్తున్నారు.