న్యూయార్క్‌‌లోని మెట్రోపాలిటన్ మ్యూజియంలో మెట్‌ గాలా ఈవెంట్ సోమవారం ప్రారంభమైంది. బాలీవుడ్‌ హీరోయిన్లు ప్రియాంక చోప్రా, దీపికా పడుకొనె, రిలయన్స్‌ ఇండస్ట్రీస్ అధినేత ముఖేశ్‌ అంబానీ కుమార్తె ఇషా అంబానీ విభిన్న వస్త్రాలంకరణలో ఆకట్టుకున్నారు. గత మూడేళ్లుగా ఈ వేడుకకు హాజరవుతున్న ప్రియాంక.. ఈసారి తన భర్త నిక్‌ జోనాస్‌తో కలిసి హాజరయ్యారు. వీరిద్దరూ తొలిసారి కలుసుకుంది ఈ వేడుకలోనే కావడం గమనార్హం. దీపిక పింక్ గౌనులో బార్బీ బొమ్మలా ముస్తాబు కాగా.. రింగు రింగుల జుట్టు, సిల్వర్‌ కలర్ గౌనులో ప్రియాంక విభిన్నంగా కనిపించారు. న్యూయార్క్‌లోని మెట్రోపాలిటన్‌ మ్యూజియం ఆఫ్‌ ఆర్ట్స్‌, కాస్ట్యూమ్‌ ఇన్‌స్టిట్యూట్ ఏటా ‘మెట్ గాలా' కార్యక్రమాన్ని నిర్వహిస్తోంది. ఈ వేడుకకు సెలబ్రిటీలు వింత దుస్తులతో హాజరవుతారు. ఈ కార్యక్రమం ద్వారా వచ్చే విరాళాలను ఛారిటీ కోసం వినియోగిస్తారు. అత్యధిక విరాళాలు సేకరించే కార్యక్రమం ఇదే కావడం విశేషం. ఈ సారి ‘క్యాంప్‌: నోట్స్‌ ఆన్‌ ఫ్యాషన్‌’ అనే థీమ్‌ను ఎంచుకున్నారు. ప్రియాంక చోప్రా మెట్ గాలాలో కనిపించిన వెంటనే.. ఆమె వస్త్రధారణ పట్ల కొందరు మీమ్స్ క్రియేట్ చేసి సోషల్ మీడియాలో పోస్ట్ చేశారు.