ప్రచండ తుఫాన్ ‘ఫణి’.. ఒడిశాలో బీభత్సం చేసిన సంగతి తెలిసిందే. తుఫాన్‌ తీరం దాటిన సమయంలో గంటకు 200 కి.మీ. వేగంతో గాలులు వీయడంతో భారీ విధ్వంసం చోటుచేసుకుంది. ఒడిశాలో కోట్లాది రూపాయల నష్టం వాటిల్లింది. ఫణి తుఫాన్ కారణంగా ఆ రాష్ట్రంలో 34 మంది మరణించారు. ఒక పూరీలోనే 21 మంది మరణించినట్లు అధికారులు వెల్లడించారు. వేలాది విద్యుత్, టెలిఫోన్ స్తంభాలు నేలకూలడంతో కమ్యూనికేషన్ వ్యవస్థ నిలిచిపోయింది. చాలా ప్రాంతాల్లో అంధకారం నెలకొంది. తుఫాన్ ప్రభావంతో తీవ్రంగా దెబ్బతిన్న ఒడిశాను ఆదుకోవడానికి పలువురు ప్రముఖులు ముందుకొస్తున్నారు. బాలీవుడ్ హీరో అక్షయ్ కుమార్ భూరి విరాళం ప్రకటించి తన పెద్ద మనసు చాటుకున్నారు. 

ఫణి తుఫాన్ ప్రభావంతో తీవ్రంగా నష్టపోయిన ఒడిశాకు అక్షయ్‌ కుమార్‌.. కోటి రూపాయాల విరాళాన్ని అందించారు. ఒడిశా సీఎం రిలీఫ్ ఫండ్‌కు ఈ మొత్తాన్ని పంపించారు. గతంలో కేరళ, చెన్నైలో తుఫాన్ బీభత్సం చేసినప్పుడు కూడా అక్షయ్‌ తన వంతు సాయం చేశారు. అంతేకాదు ‘భారత్ కే వీర్‌’ వెబ్‌సైట్‌ ద్వారా ఆయన జవాన్ల కుటుంబాలకు అండగా నిలుస్తున్నారు.శంకర్ దర్శకత్వంలో తెరకెక్కిన 2.0 సినిమాలో విలన్‌గా విలక్షణ నటనా తీరుతో ప్రేక్షకుల మది దోచుకున్న అక్షయ్ కుమార్.. ఇటీవల ప్రధాని మోదీని ఇంటర్వ్యూ చేసి వార్తల్లో ప్రముఖంగా నిలిచిన సంగతి తెలిసిందే. రాజకీయాలు కాకుండా వ్యక్తిగత అంశాలపై ఆసక్తికర ప్రశ్నలు అడిగి అందరి దృష్టిని ఆకర్షించారు. అయితే.. ప్రధానిని ఇంటర్వ్యూ చేసిన అక్షయ్ ఎన్నికల్లో ఓటు వేయకపోవడంపై విమర్శల పాలయ్యారు. వాస్తవానికి అక్షయ్ కుమార్‌కు కెనడా పౌర‌స‌త్వం ఉంది. అందువల్ల ఆయనకు భార‌త్‌లో ఓటు హక్కు లేదు. ఈ అంశంపై నెటిజన్లు ట్రోల్ చేశారు. అయితే.. ఏడేళ్లుగా భార‌త్‌లోనే ఉంటున్న తాను ఇక్కడ ప‌లు ర‌కాల ప‌న్నులు క‌డుతున్నట్టు వివరించారు. ఈ విష‌యాన్ని అన‌వ‌స‌రంగా రాద్ధాంతం చేయోద్దన్నారు.తన‌కు కెన‌డా పౌర‌సత్వం ఉన్నప్పటికీ భార‌తీయుల కోసం అక్షయ్ ఎన్నో స‌హాయ కార్యక్రమాలు చేప‌ట్టారు. ఆప‌ద‌లో ఉన్న వారికి త‌న‌వంతు సాయంగా ఎంతో కొంత విరాళాలు అందిస్తూనే ఉన్నారు. ఇటీవల పుల్వామా ఉగ్రదాడిలో అమరులైన జవాన్ల కుటుంబాలకు రూ. 5 కోట్ల విరాళాన్ని అందించారు. అంతకుముందు కొంత మంది నిరుపేద యువతులకు సామూహిక వివాహాలు జరిపించే కార్యక్రమంలో పాల్గొని ఒక్కో యువ‌తికి రూ. ల‌క్ష చొప్పున అంద‌జేశారు. చివ‌రిసారిగా ‘కేస‌రి’ చిత్రంతో ప్రేక్షకుల ముందుకు వ‌చ్చిన అక్షయ్.. ప్రస్తుతం రోహిత్ శెట్టి డైరెక్షన్‌లో సూర్యవంశీ అనే చిత్రం చేస్తున్నారు. ఇందులో పోలీస్ ఆఫీస‌ర్‌గా క‌నిపించ‌నున్నట్లు తెలుస్తోంది. ‘గుడ్ న్యూస్’ అనే మరో చిత్రం షూటింగ్‌తోనూ అక్షయ్ బిజీగా ఉన్నారు.