యువ్ న్యూస్ జనరల్ బ్యూరో:
 

బరువు తగ్గాలంటే ఏం చేయాలి? రోజూ వ్యాయామం చేయాలి. కొవ్వు పదార్థాలను అతిగా తినకూడదని, మద్యానికి దూరంగా ఉండాలని ఇంకా ఇలాంటి చిట్కాలు ఎన్నో చెబుతుంటారు. అయితే, అమెరికాకు చెందిన 43 ఏళ్ల డెల్ హాల్ జస్ట్ బీరు మాత్రమే తాగుతూ 20 కిలోల బరువు తగ్గి అందరినీ ఆశ్చర్యపరిచాడు. అదేంటీ? బీరు తాగితే బరువు పెరుగుతారే గానీ తగ్గడం ఏమిటని ఆలోచిస్తున్నారా? అదీ నిజమే! బీరులో ఉండే సుగర్ కంటెంట్ వల్ల బరువు పెరిగే అవకాశాలు ఉంటాయని వైద్యులు చెబుతారు. అయితే, డెల్ హాల్ బీరు మాత్రమే తాగుతూ బరువు తగ్గడం ఆశ్చర్యకరం. ‘బీర్ డైట్’ అనేది ప్రాచీన కేథలిక్ సాంప్రదాయం. సుమారు 1600 ఏళ్ల కిందట సన్యాసులు ఈ డైట్ పాటించేవారు. దీంతో డెల్‌కు కూడా ‘బీర్ డైట్’ పాటించేందుకు కంకణం కట్టుకున్నాడు. 46 రోజులపాటు వేరే ఆహారం ముట్టుకోకుండా రోజుకు 5 బీర్లు మాత్రమే తాగేవాడు. ఈ సందర్భంగా జర్మనీకి చెందిన ‘బోక్ బీర్’ కేసును ఇంట్లో పెట్టుకున్నాడు. ఈ బీర్‌ను లిక్విడ్ బ్రెడ్ అని కూడా అంటారు. ఒహియోలో నివసిస్తున్న డెల్ హాల్ ఓ బీరు తయారీ సంస్థలో ఎగ్జిక్యూటివ్‌గా పనిచేస్తున్నాడు.