అసలే వేసవి సెలవులు. అందులోనూ థియేటర్స్‌లో పెద్దగా సినిమాలేవీ లేవు. ఈ టైంలో సూపర్ స్టార్ మహేష్ బాబు సినిమా థియేటర్స్‌లోకి వస్తుందంటే.. అభిమానుల కోలాహలం .. హౌస్ ఫుల్ బోర్డులు.. బాక్సాఫీస్ షేకింగ్‌లు కామన్‌గానే ఉంటాయి. ఈ వేసవి వినోదాన్ని ‘మహర్షి’ చిత్రంతో ప్రేక్షకులకు అందించేందుకు సూపర్ స్టార్ మహేష్ బాబు గురువారం థియేటర్స్‌లో ఎంట్రీ ఇస్తున్నాడు. 

మహేష్ కెరియర్‌లో 25 మూవీగా అత్యంత ప్రతిష్ఠాత్మకంగా వంశీ పైడిపల్లి దర్శకత్వం వహించిన ఈ చిత్రం రేపు (మే 9) ప్రపంచ వ్యాప్తంగా సుమారు 2500 థియేటర్స్‌లో భారీ ఎత్తున విడుదల కానుంది. ఇప్పటికే ఆన్‌లైన్‌లో బుకింగ్స్ క్లోజ్ కాగా.. ఈ సినిమాను ఎప్పుడెప్పుడు చూద్దామా అని ఆయన అభిమానులు థియేటర్స్ వద్ద పడిగాపులు కాస్తున్నారు. ఇక ఈ చిత్రానికి ఇంత హైప్ క్రియేట్ కావడానికి కారణం ఏంటి? ‘మహర్షి’‌తో మహేష్.. మహా‘రిషి’ కాబోతున్నాడా? ఈ చిత్రానికి కలిసి వచ్చే ప్రధానమైన ఆ ఐదు అంశాలేంటో ఓ లుక్కేద్దాం. 

1. మహేష్ బాబు.. 

టాలీవుడ్ స్టార్‌ హీరోల్లో ముందువరుసలో ఉండి నెంబర్‌వన్ అనిపించుకుంటున్న మహేష్‌కి ‘మహర్షి’ చిత్రం చాలా ప్రత్యేకం. రాజకుమారుడు చిత్రంతో ఇండస్ట్రీలోకి అడుగుపెట్టిన మహేష్ బాబుకి ‘మహర్షి’ 25వ చిత్రం కావడంతో ఈ చిత్రాన్ని అత్యంత ప్రతిష్టాత్మకంగా రూపిందించారు. ఈ సినిమాలో మహేష్.. బిలీనియర్‌గా, స్టూడెంట్‌గా, రైతుగా మూడు విభిన్నపాత్రల్లో కనిపించబోతున్నారు. ‘భరత్ అనే నేను’ బ్లాక్ బస్టర్ హిట్ తరువాత ‘మహర్షి’ చిత్రంలో నటించడంతో ఈ సినిమాపై విపరీతమైన అంచనాలు ఏర్పడ్డాయి. ఈ అంచనాలకు తగ్గట్టుగానే మహేష్ బాబు డిఫరెంట్స్ లుక్స్‌తో టీజర్‌, ట్రైలర్‌లలో ఆకట్టుకున్నాడు. ఇక మూడుగంటల పాటు భారీ నిడివితో ఉన్న ‘మహర్షి’ చిత్రంలో మహేష్ తన అభిమానుల్ని మెస్మరైజ్ చేయడం ఖాయంగానే కనిపిస్తోంది. 

2. ముగ్గురు నిర్మాతలు.. భారీ హంగులు 

ఒక చిత్రానికి ఒకరిద్దరు నిర్మాతలు ఉంటారు. లేదంటే హీరో కూడా నిర్మాణంలో భాగం అవుతూ ఉంటుంటారు. కాని ‘మహర్షి’ చిత్రం చాలా ప్రత్యేకం. ఈ చిత్రానికి టాలీవుడ్ స్టార్ ప్రొడ్యుసర్‌లు ముగ్గురూ నిర్మాతలుగా ఉండటం విశేషం. దిల్ రాజు, అశ్వనీదత్, పీవీపీలు సుమారు రూ. 135 కోట్ల భారీ బడ్జెట్‌తో ‘మహర్షి’ చిత్రాన్ని నిర్మించారు. శ్రీవెంకటేశ్వర క్రియేషన్స్, వైజయంతీ మూవీస్, పీవీపీ సినిమాస్ బ్యానర్లపై ఈ చిత్రాన్ని భారీ హంగులతో నిర్మించారు. ఖర్చు విషయంలో ఎక్కడా వెనకడుగు వేయకుండా ‘మహర్షి’ చిత్రాన్ని హై టెక్నాలజీ వాల్యూస్‌తో గ్రాండ్‌ లుక్‌తో భారీగా 2500 థియేటర్స్‌లో ‘మహర్షి’ చిత్రాన్ని విడుదల చేస్తున్నారు. 

3. వంశీ పైడిపల్లి 

దర్శకుడిగా వంశీ పైడిపల్లి చేసినవి నాలుగే సినిమాలు అయినప్పటికీ స్టార్ దర్శకుల సరసన చోటు సంపాదించడానికి కారణం ఆయన దర్శకత్వం వహించిన ఊపిరి, ఎవడు, బృందావనం చిత్రాలు బ్లాక్ బస్టర్ హిట్లు కావడం. తొలి చిత్రం మున్నాతో పెద్దగా ఆకట్టుకోలేకపోయినా.. టేకింగ్ పరంగా ప్రశంసలు దక్కించుకున్నారు. కెరియర్ స్టార్టింగ్‌లోనే ప్రభాస్, ఎన్టీఆర్, రామ్ చరణ్, నాగార్జున వంటి స్టార్ హీరోలతో పనిచేసిన వంశీ.. మహేష్‌తో పనిచేయడం కోసం రెండేళ్లు నిరీక్షించి.. ‘మహర్షి’ కథలో మహేష్‌ని మెప్పించి ఆయన్ని ఒప్పించి పట్టువదలని విక్రమార్కుడిలా ఈ సినిమాను రూపొందించారు. 

4. హీరోయిన్‌గా పూజా హెగ్డే.. కీలకపాత్రలో నరేష్ 

డీజే, అరవింద సమేత లాంటి బ్లాక్ బస్టర్ హిట్ చిత్రాల్లో హీరోయిన్‌గా నటించి గోల్డెన్ బ్యూటీ అవతారం ఎత్తిన పూజా హెగ్డే.. ‘మహర్షి’ చిత్రంలో మహేష్‌కి జోడీగా గోల్డెన్ ఛాన్స్‌ను అందుకుంది. ఈ చిత్రంలో అతి తక్కువ కాలంలోనే స్టార్ హీరోయిన్‌ రేంజ్‌కి ఎదిగింది. అందం, అభినయంతో పాటు.. గ్లామర్ సొగసులతో గాలం వేయడాన్ని అలవాటుగా చేసుకున్న పూజా హెగ్డే ఈ చిత్రంలో గ్లామర్ డోస్‌ని బాగానే పెంచిందనడానికి పాలపిట్ట సాంగ్‌ని అర్ధమైపోతుంది. 

ఇక టాలీవుడ్‌ కామెడీ హీరోగా తనదైన ముద్ర వేసుకున్న హీరో అల్లరి నరేష్.. ఈ చిత్రంలో మహేష్, పూజా హెగ్డేలకు స్నేహితుడిగా కీలకపాత్రలో నటిస్తున్నాడు. ‘మహర్షి’ కథ ఈ పాత్ర చుట్టూనే అల్లాడు దర్శకుడు వంశీ పైడిపల్లి. గాయం, శంభోశివశంభో వంటి చిత్రాల్లో కీలకపాత్రల్లో నటించి మెప్పించిన నరేష్.. ‘మహర్షి’ చిత్రంలో నటించడం సినిమాకి మరో ప్లస్. 

5. దేవి శ్రీ ప్రసాద్ 

తెలుగు, తమిళ, కన్నడ భాషల్లో వరుస మ్యూజికల్ హిట్స్‌తో రాక్ స్టార్‌గా పేరొందిన దేవి శ్రీప్రసాద్.. ‘మహర్షి’ చిత్రానికి మ్యూజిక్ ఇవ్వడం ఈ చిత్రానికి ప్లస్ అయ్యింది. గతంలో మహేష్‌కి ‘1 నేనొక్కడినే’, ‘శ్రీమంతుడు’, ‘భరత్ అనే నేను’ లాంటి మ్యూజికల్ హిట్స్ ఇచ్చిన దేవి.. మరోసారి ‘మహర్షి’ చిత్రానికి పనిచేశారు. అయితే ఈ చిత్రంలోని ఆరు పాటలు అనుకున్నంత రేంజ్‌లో లేకపోయినప్పటికీ.. నాలుగు మాంటేజ్ సాంగ్స్ ఉండటాన్ని బట్టి కథానుగుణంగా దేవి శ్రీ ఈ పాటల్ని కంపోజ్ చేసినట్టు తెలుస్తోంది. ఇలాంటి కథలో భాగంగా ఉన్న పాటలు వినడం కంటే చూసేప్పుడే ఎక్కువ థ్రిల్ అయ్యే అవకాశం ఉంటుంది. దీంతో పాటు బలమైన ఎమోషన్స్ సీన్స్‌తో కుటుంబ కథా చిత్రంగా రూపొందించిన ‘మహర్షి’ చిత్రానికి దేశి శ్రీ అద్భుతమైన బ్యాగ్రౌండ్ మ్యూజిక్ అందించారు. సీన్లు పండటంలో దేవి శ్రీ ఆర్ ఆర్ కీలకం కానున్న నేపథ్యంలో మరోసారి మ్యూజిక్‌తో మ్యాజిక్ చేయడం ఖాయంగానే కనిపిస్తుంది