ఏపీలో మే 15న జరగాల్సిన స్పెషల్ డీఎస్సీ పరీక్ష వాయిదా పడింది. పరీక్షను మే 31కి వాయిదా వేసినట్లు ఏపీ పాఠశాల విద్యాశాఖ కమిషనర్‌ సంధ్యారాణి మే 7న ఒక ప్రకటనలో తెలిపారు. ఒప్పంద ప్రాతిపదికన పనిచేస్తున్న అభ్యర్థుల వయోపరిమితిని పెంచుతూ ప్రభుత్వం ఉత్తర్వులు జారీ చేసిన నేపథ్యంలో.. దరఖాస్తు ఫీజు చెల్లింపు గడువును మే 15 వరకు, దరఖాస్తుల సమర్పణ గడువును 16 వరకు పొడిగించినట్లు ఆమె తెలిపారు. ఈ కారణంగా మే 15న నిర్వహించాల్సి ఉన్న పరీక్షను కూడా వాయిదా వేసినట్లు ఆమె వెల్లడించారు. దరఖాస్తు గడువు ముగిసిన తర్వాత పరీక్షా కేంద్రాల ఎంపిక కోసం అభ్యర్థులు మే 17 నుంచి 20 వరకు వెబ్‌ ఆప్షన్లు ఇచ్చుకోవాలని ఆమె తెలిపారు. అలాగే మే 31న నిర్వహించనున్న పరీక్ష హాల్‌టికెట్లను మే 25 నుంచి వెబ్‌సైట్ ద్వారా డౌన్‌లోడ్‌ చేసుకోవాలని సంధ్యారాణి సూచించారు. ఏపీలో మొత్తం 602 ప్రత్యేక ఉపాధ్యాయ పోస్టుల భర్తీకి పాఠశాల విద్యాశాఖ ఫిబ్రవరి 16న నోటిఫికేషన్ విడుదల చేసిన సంగతి తెలిసిందే. ఫిబ్రవరి 25న దరఖాస్తు ప్రక్రియ ప్రారంభమైంది. అయితే ఈ నోటిఫికేషన్‌లో ఇప్పటికే పనిచేస్తున్న ఉపాధ్యాయులకు గరిష్ఠ వయోపరిమితి 44 ఏళ్లు, వెయిటేజీ ఐదు మార్కులు ఇచ్చారు. దీనిపై అభ్యంతరం వ్యక్తంచేసిన ఒప్పంద ఉద్యోగులు వయోపరిమితిని 54 ఏళ్లకు పెంచాలని, వెయిటేజీ మార్కులను కూడా 5 నుంచి 10 మార్కులకు పెంచాలని విద్యాశాఖకు విన్నవించారు. దీనిపై ప్రభుత్వం సానుకూలంగా స్పందించి వయోపరిమితి పెంచడంతో.. పరీక్ష నిర్వహణకు మార్గం సుగమమైంది.