సెన్సేషనల్ హీరో విజయ్ దేవరకొండ నేడు తన పుట్టినరోజును ఆస్వాదిస్తున్నారు. ఇటీవలే ‘డియర్ కామ్రేడ్’ షూటింగ్‌ను పూర్తిచేసుకున్న విజయ్.. కాస్త రిలాక్స్ అయ్యారు. ఇంతలో పుట్టినరోజు 

రానే వచ్చింది. ఈసారి పుట్టినరోజు వేడుకలను ప్రముఖ నిర్మాత కె.ఎస్.రామారావు నిర్మాణ సంస్థ క్రియేటివ్ కమర్షియల్స్ ఆఫీసులో విజయ్ జరుపుకున్నారు. ఈ వేడుకలో హీరోయిన్ రాశీ ఖన్నా కూడా పాల్గొన్నారు. క్రియేటివ్ కమర్షియల్స్ బ్యానర్‌లో ప్రస్తుతం విజయ్ దేవరకొండ ఒక సినిమా చేస్తున్నారు. క్రాంతి మాధవ్ దర్శకత్వం వహిస్తున్నారు. రాశీ ఖన్నా హీరోయిన్. ఇంకా టైటిల్ ఖరారు కానీ ఈ సినిమా ప్రస్తుతం షూటింగ్ దశలో ఉంది. ఇటీవల కొత్తగూడెంలో షూటింగ్ జరిపారు. ఈ చిత్రంలో విజయ్ దేవరకొండ సింగరేణి కార్మికుడిగా కనిపించనున్నట్లు సమాచారం. దీనికి సంబంధించిన సన్నివేశాలనే కొత్తగూడెంలో చిత్రీకరించినట్లు తెలుస్తోంది. ఇదిలా ఉంటే, నేడు విజయ్ పుట్టినరోజును పురష్కరించుకుని చిత్ర యూనిట్ కేక్ కటింగ్ కార్యక్రమాన్ని ఏర్పాటుచేసింది. ఈ వేడుకలో నిర్మాత కె.ఎస్.రవికుమార్, దర్శకుడు క్రాంతి మాధవ్, హీరోయిన్ రాశీఖన్నా సహా యూనిట్ సభ్యులు పాల్గొన్నారు. వారి సమక్షంలో విజయ్ కేక్ కట్ చేశారు. కాగా, క్రాంతి మాధవ్ గతంలో ‘ఓనమాలు’, ‘మళ్ళీ మళ్ళీ ఇది రానిరోజు’ వంటి మంచి చిత్రాలతో విమర్శకుల ప్రశంసలు అందుకున్నారు. ఇప్పుడు విజయ్ దేవరకొండ లాంటి క్లాస్, మాస్‌ను అలరించే హీరోతో కొత్త ప్రయోగం చేస్తున్నారు. ఈ సినిమాలో విజయ్ సరసన రాశీ ఖన్నాతో పాటు ఐశ్వర్య రాజేష్‌, ఇజబెల్లె కూడా హీరోయిన్లుగా నటిస్తున్నారు.