ఇటీవల ప్రత్యక్ష రాజకీయాల్లోకి వచ్చిన ప్రియాంక గాంధీ యూపీ తూర్పు కాంగ్రెస్ ప్రధాన కార్యదర్శి హోదాలో ఎన్నికల ప్రచారం నిర్వహిస్తున్నారు. విలక్షణ శైలిలో ప్రియాంక గాంధీ ఎన్నికల ప్రచారం సాగుతోంది. అయితే, మధ్యప్రదేశ్‌లో మంగళవారం ఎన్నికల ప్రచారానికి వచ్చిన ప్రియాంకకు విచిత్రమైన అనుభవం ఎదురయ్యింది. ఇండోర్ విమానాశ్రయం నుంచి ప్రియాంక కారులో వెళ్తుండగా బీజేపీ కార్యకర్తలు మోదీ.. మోదీ.. మోదీ అని నినాదాలు చేస్తూ రెచ్చగొట్టే ప్రయత్నించారు. అయితే, వెంటనే తన వాహనం నుంచి దిగిన ప్రియాంక హుందాగా వ్యవహరించారు. ప్రియాంక వ్యవహరించిన తీరుపై ఇప్పుడు ప్రశంసలు కురుస్తున్నాయి. సోమవారం ఇండోర్‌ విమానాశ్రయానికి చేరుకున్న ప్రియాంక, బహిరంగ సభలో పాల్గొనేందుకు వెళ్తున్నారు. ఆమె కాన్వాయ్ వెళ్లే మార్గంలో కొందరు బీజేపీ కార్యకర్తలు చేరుకుని, ప్రియాంక గాంధీ రాగానే ‘మోదీ.. మోదీ.. మోదీ’ అని నినాదాలు మొదలుపెట్టారు. దీన్ని గమనించిన ప్రియాంక సెక్యూరిటీ సిబ్బంది సాయంతో కారు దిగి, వారి వద్దకు నేరుగా వెళ్లారు. బీజేపీ కార్యకర్తలతో ప్రియాంక గొడవ పెట్టుకుంటారేమోనని అందరూ భావించారు. కానీ, ఊహించని విధంగా వారిని ప్రియాంక చిరునవ్వుతో పలకరించి, కరచాలం చేసి ఆల్ ది బెస్ట్ చెప్పారు. దీంతో షాక్ తిన్న బీజేపీ కార్యకర్తలు కూడా ఆమెకు షేక్ హ్యాండ్ ఇచ్చారు. ప్రియాంక నిరాడంబరతను వారు మొచ్చుకోకుండా ఉండలేకపోయారు. వారిపై ప్రియాంక ఆగ్రహం వ్యక్తం చేసి ఉంటే బీజేపీ కార్యకర్తలు కూడా రెచ్చిపోయేవారని, దాంతో కాంగ్రెస్ శ్రేణులు కూడా బాహాబాహీ అనేవని అంటున్నారు. కానీ ప్రియాంక ఎంతో హుందాగా వ్యవహరించారని పలువురు ప్రశంసలు కురిపిస్తున్నారు. ఈ ఘటనకు సంబంధించిన వీడియో ప్రస్తుతం సోషల్ మీడియాలో హల్‌చల్ చేస్తోంది. ఇండోర్ పార్లమెంటు స్థానానికి చివరి దశలో ఎన్నికలు జరుగుతున్నాయి. గత 30 ఏళ్లుగా ఇక్కడ బీజేపీ అభ్యర్థులే విజయం సాధిస్తున్నారు. ఈసారి ఏలాగైనా ఇండోర్‌ను తమ ఖాతాలో వేసుకోవాలని కాంగ్రెస్ విశ్వ ప్రయత్నాలు చేస్తోంది. మంగళవారం ఇక్కడ తొలిసారి ఎన్నికల ప్రచారం నిర్వహించిన ప్రియాంక గాంధీకి ప్రజలు బ్రహ్మరథం పట్టారు. మహిళలు పెద్ద ఎత్తున రోడ్ షోలో పాల్గొన్నారు.