న్యూస్ ఛానల్ టీవీ9 ఇటీవల బాగా వార్తల్లో నిలిచింది. మాజీ సీఈవో రవి ప్రకాశ్ ఫోర్జరీ ఉదంతం ఇందుకు కారణం. ఇప్పుడు ఈ టీవీ9 మరోమారు వార్తల్లోకి ఎక్కింది. ఈసారి ఆదాయం పరంగా. ఈ సంస్థ ఆదాయం ఎంతో తెలిస్తే షాక్ అవుతారు. అసోసియేటెడ్ బ్రాడ్‌కాస్టింగ్ కంపెనీ (ఏబీసీపీఎల్) కంపెనీ 2017-18 ఆర్థిక సంవత్సరంలో ఏకంగా రూ.200 కోట్లకుపైగా ఆదాయాన్ని గడించింది. వార్షిక ప్రాతిపదికన 21 శాతం పెరుగుదల కనిపించింది. రూ.5.86 కోట్ల నికర లాభాన్ని నమోదు చేసింది. టీవీ9 లోగో‌తో ఏబీసీపీఎల్ వివిధ భాషల్లో ఛానళ్లను నడుపుతోంది. మాజీ సీఈవో, డైరెక్టర్ రవి ప్రకాశ్ ఫోర్జరీ ఆరోపణలతో ఈ సంస్థ ఇటీవల వార్తల్లోకి ఎక్కిన విషయం తెలిసిందే. ప్రస్తుతం అలందా మీడియా అండ్ ఎంటర్‌టైన్‌మెంట్స్.. ఏబీసీపీఎల్‌లో 90 శాతానికి పైగా వాటాలను కలిగి ఉంది. మేఘా ఇంజనీరింగ్ అండ్ ఇన్‌ఫ్రాస్ట్రక్చర్, మై హోమ్ గ్రూప్‌కు చెందిన వ్యక్తులు అలందా సంస్థను ప్రమోట్ చేస్తున్నారు. 

బలమైన ఆదాయ వృద్ధికి తెలంగాణ, కర్ణాటక టీవీ9 ఛానళ్ల పాపులారిటీ కారణమని కేర్ రేటింగ్స్ తెలిపింది. కంపెనీ ఆదాయంలో దాదాపు 80 శాతం వీటి ద్వారానే లభించిందని పేర్కొంది. లీడర్‌షిప్ పొజిషన్, మార్కెటింగ్, సెల్లింగ్ స్ట్రాటజీలు ఆదాయ పెరుగుదలకు కారణమని తెలిపింది.సమర్థవంతమైన మేనేజ్‌మెంట్, ప్రమోటర్ల ఆర్థిక బలం సహా టీవీ9 తెలుగు, టీవీ9 కన్నడ, టీవీ9 గుజరాతీ ఛానళ్ల అగ్రస్థానం వంటి అంశాల నేపథ్యంలో కేర్ రేటింగ్స్ ఈ సంస్థకు బీబీబీ స్టేబుల్ రేటింగ్ ఇచ్చింది.