యువ్ న్యూస్ పొలిటికల్ బ్యూరో:

దేశ వ్యాప్తంగా ఎంతో ఆసక్తిగా ఎదురుచూసిన 2019 ఎన్నికలపై ఎగ్జిట్ పోల్స్ వచ్చేశాయి. లోక్ సభ, అసెంబ్లీ స్థానాలకు సంబంధించి వివిధ జాతీయ ఛానల్స్‌తో పాటు.. ఆంధ్రా ఆక్టోపస్‌గా (ఒకప్పుడు) పేరొందిన లగడపాటి సర్వే కూడా వచ్చేసింది. దేశ వ్యాప్తంగా అన్ని సర్వే సంస్థలు మరోసారి మోడీకే పట్టం కడుతుంటే.. తెలుగు రాష్ట్రాల్లో ఒక్క లగడపాటి మినహా మిగిలిన జాతీయ సర్వే సంస్థలు, ఛానల్స్ వైసీపీ వైపు మొగ్గు చూపాయి. వైసీపీకి ఎడ్జ్ ఉన్నా.. కొన్ని సర్వేల్లో తెలుగుదేశం పార్టీ గట్టిపోటీ ఇచ్చింది. అయితే ఈ పోల్స్‌లో ఆసక్తికరమైన అంశం ఏంటంటే జనసేన పార్టీతో ప్రత్యక్ష రాజకీయాల్లోకి దిగి సత్తా చూపిస్తాడనుకున్న పవన్ కళ్యాణ్ పత్తా లేకుండా పోవడం. నిన్న లగడపాటి ప్రెస్ మీట్‌లో ఎవరు గెలిచిన గెలవక పోయినా.. పవన్ కళ్యాణ్ ఖచ్చితంగా గెలుస్తాడని జోస్యం చెప్పి నేటి పోల్స్‌లో పవన్‌ని సింగిల్ డిజిట్‌కే పరిమితం చేశారు. 1 నుండి 5 సీట్లు రావొచ్చని లగడపాటి సర్వే ఇచ్చారు. ఇక జాతీయ సర్వే సంస్థల విషయానికి వస్తే.. ఇండియా టుడే సున్నా నుండి 1, ఐఎన్ఎస్ఎస్ 5, సీపీఎస్ సున్నా నుండి 1, వీడీపీ అసోసియేట్స్ సున్నా నుండి 4, న్యూస్ 18 సున్నా నుండి 1, చాణుక్య సున్నా, సీ ఓటర్స్ సున్నా, న్యూస్ ఎక్స్ సున్నా, ఇండియా టీవీ సున్నా, జన్‌ కీ బాత్ సున్నా స్థానాలను కేటాయించారు. నేషనల్ సర్వే సంస్థలు హీరోకి ఎక్కువగా జీరోలనే ఇచ్చారు. ఇక లోక్ సభ స్థానానికి ఒక్క సీటు కూడా ఇవ్వకపోవడం గమనార్హం. అయితే ఇండియా టుడే సర్వేలో ఇతరులు కింద ఒక లోక్ సభ స్థానం ఇచ్చారు. అయితే ఆ ఒక్కస్థానంలో బీజేపీ, కాంగ్రెస్, బీఎస్పీ ఇలా చాలా పార్టీలు ఉన్నాయి. అన్నట్టు కేఏ పాల్ ప్రజాశాంతి పార్టీ ఉన్నట్టు కూడా జాతీయ ఛానల్స్‌కి తెలిసినట్టే లేదు. ఎక్కడా ఈ పార్టీ గురించి ప్రస్తావనే లేదు.