మాజీ మంత్రి, మైనింగ్ కింగ్ గాలి జనార్దన్ రెడ్డి మామిడి చెట్టెక్కారు. తన భార్య కోసం స్వయంగా మామిడి చెట్టెక్కి పచ్చగా నిగనిగలాడుతోన్న మామిడి కాయను కోసి అర్ధాంగి లక్ష్మీ అరుణ చేతికి అందించారు. కాసేపు చెట్టుపై కూర్చొని చిన్ననాటి జ్ఞాపకాలను గుర్తుకు తెచ్చుకున్నారు. ఈ మేరకు తాను మామిడి చెట్టు ఎక్కిన వీడియోను జనార్దన్ రెడ్డి తన ఫేస్‌బుక్ అకౌంట్‌లో పోస్ట్ చేశారు. వీడియోకి బ్యాక్‌గ్రౌండ్‌లో మంచి కన్నడ పాటను కూడా జోడించారు. గాలి జనార్దన్ రెడ్డి మామ అయిన పరమేశ్వరరెడ్డి సొంత గ్రామం కర్నూలు జిల్లా కాకనూరు. తన భార్య లక్ష్మీ అరుణతో కలిసి ఇటీవల కాకనూరు వెళ్లిన జనార్దన్ రెడ్డి.. మామ గారి ఊళ్లోని మామిడి తోటకు వెళ్లారు. ఇటీవల, ఆంధ్రప్రదేశ్‌లోని మా మామగారి గ్రామంలో జరిగిన ఫ్యామిలీ ఫంక్షన్‌లో పాల్గొన్నాను. అక్కడ, నా భార్య శ్రీమతి లక్ష్మీ అరుణతో కలిసి మామగారి తోటకు వెళ్లాను. ఒక మామిడి చెట్టు ఎక్కాను. 27 ఏళ్ల క్రితం నాటిన ఆ మామిడి చెట్టు నిండుగా మామిడి కాయలతో నన్ను ఎంతగానో ఆకర్షించింది. చూడగానే ఎక్కేయాలనిపించింది. ఒక్క సెకెను కూడా ఆలస్యం చేయకుండా చెట్టు ఎక్కేశాను. ఈ ఘటన నా చిన్నతనాన్ని గుర్తుచేసింది. నా స్నేహితులతో కలిసి చెట్లు ఎక్కేవాడిని, వాటిపై నుంచి గెంతేవాడిని. ఆ కాలంలోకి వెళ్లిపోయాను. ప్రతి ఒక్కరి జీవితంలోనూ చిన్ననాటి రోజులు బంగారు క్షణాలు. దేని గురించి పట్టించుకోకుండా గడిపే ఆ జీవితం చాలా మందికి ఎంతో అపురూపమైన విషయం’ అని జనార్దన్ రెడ్డి తన పోస్ట్‌లో పేర్కొన్నారు.