యువ్ న్యూస్ పొలిటికల్ బ్యూరో:

టీడీపీ కార్యకర్తల జోలికొస్తే ఊరుకునేది లేదని హెచ్చరించారు మాజీ మంత్రి, టీడీపీ జాతీయ కార్యదర్శి నారా లోకేష్. అధికారంలోకి వచ్చిన పార్టీకి చెబుతున్నా.. టీడీపీ కార్యకర్తల జోలికి రావొద్దన్నారు. లా అండ్ ఆర్డర్‌ను కాపాడుకోవాల్సిన బాధ్యత అందరిపై ఉందన్నారు. రాబోయే రోజుల్లో కార్యకర్తలకు అండగా ఉంటానంటూ భరోసా నింపే ప్రయత్నం చేశారు. మంగళగిరిలో జరిగిన ఎన్టీఆర్ జయంతి వేడుకల్లో లోకేష్ పాల్గొన్నారు. ఎన్టీఆర్ విగ్రహానికి పూలమాలలు వేసి నివాళులు అర్పించారు. అభివృద్ధి ఎన్టీఆర్‌తోనే ఆరంభమయ్యింది.. టీడీపీ ఓడిపోవడం ఇది మొదటి సరికాదన్నారు లోకేష్. కార్యకర్తల సంక్షేమానికి పెద్ద పీట వేసింది ఒక్క తెలుగుదేశం పార్టీ మాత్రమే అన్నారు. తనకు అక్కాచెల్లెళ్లు లేరని.. కానీ 70 లక్షల మంది కుటుంబం ఉందన్నారు. ఇకపై కార్యకర్తలు, ప్రజలకు అందుబాటులో ఉంటానన్న లోకేష్.. జూన్ మొదటి వారం నుంచి మండలాల వారీగా సమావేశాలు నిర్వహించి స్థానిక సంస్థలు ఎన్నికలకు సిద్ధమవుతామని చెప్పారు. ఏపీలో త్వరలో జరగబోయే స్థానిక సంస్థల ఎన్నికలకు అందరూ సిద్ధంగా ఉండాలన్నారు లోకేష్. టీడీపీకి సేనాధిపతి చంద్రబాబు అయితే.. కార్యకర్తలు, నేతలు సైనికులమన్నారు. 2024లో మంగళగిరిలో టీడీపీ జెండా ఎగురవేస్తామన్నారు లోకేష్. ఓడిపోయిన దగ్గరే మళ్లీ గెలవాలనేది తన సంకల్పమని.. ఎమ్మెల్సీగా ఉండి ప్రజా సమస్యలపై నిరంతరం పోరాడుతానన్నారు. 2024లో ఏపీ సీఎంగా చంద్రబాబు మళ్లీ ప్రమాణస్వీకారం చేస్తారని లోకేష్ ధీమా వ్యక్తం చేశారు.