యువ్ న్యూస్ పొలిటికల్ బ్యూరో:
 

తెలుగుదేశం పార్టీ శాసనసభాపక్ష నేతగా ఆ పార్టీ అధినేత చంద్రబాబు నాయుడు ఎన్నికయ్యారు. ఉండవల్లిలో గల బాబు నివాసంలో నేడు కొత్తగా ఎన్నికైన టీడీపీ ఎమ్మెల్యేల సమావేశం జరిగింది. ఈ సమావేశంలో చంద్రబాబును టీడీఎల్పీ నేతగా ఏకగ్రీవంగా ఎన్నుకున్నారు. భేటీలో నూతనంగా ఎన్నికైన ఎమ్మెల్యేలు, ఎంపీలతో పాటు నారా లోకేశ్‌, సుజనాచౌదరి, కనకమేడల రవీంద్రకుమార్‌, కళా వెంకట్రావు, చినరాజప్పు, యనమల రామకృష్ణుడు తదితరులు పాల్గొన్నారు. టీడీపీ శానససభాపక్ష నేతగా ఎన్నికైన చంద్రబాబు  పలు కీలక నిర్ణయాలు తీసుకున్నారు. గుంటూరు లోక్ సభ సభ్యుడు గల్లా జయదేవ్ ను టీడీపీ పార్లమెంటరీ నేతగా చంద్రబాబు నియమించారు. అలాగే శ్రీకాకుళం లోక్ సభ సభ్యుడు కె.రామ్మోహన్ నాయుడిని లోక్ సభలో టీడీపీ ఫ్లోర్ లీడర్ గా ఖరారు చేశారు. రాజ్యసభలో టీడీపీ ఫ్లోర్ లీడర్ గా సుజనా చౌదరిని నియమించారు.మరోవైపు ఈరోజు అమరావతిలో జరిగిన సమావేశంలో పార్టీ కార్యాలయం విషయంలో టీడీపీ నేతల మధ్య చర్చ సాగింది. గుంటూరులోని టీడీపీ కార్యాలయం అందరికీ అందుబాటులో లేదనీ, విజయవాడలో అయితే నేతలందరికీ అందుబాటులో ఉంటుందని పలువురు నేతలు పార్టీ అధినేత దృష్టికి తీసుకొచ్చారు. దీనిపై సానుకూలంగా స్పందించిన చంద్రబాబు.. విజయవాడలో టీడీపీ తాత్కాలిక కార్యాలయం ఏర్పాటు బాధ్యతను కేశినేని నానికి అప్పగించారు.