యువ్ న్యూస్  ఫిల్మ్ బ్యూరో:
 

మహా నేత వైఎస్ రాజశేఖర్ రెడ్డి జీవిత కథలోని పాదయాత్రను ఆధారంగా చేసుకుని మహి వి రాఘవ తెరకెక్కించిన చిత్రం ‘యాత్ర’. రాజశేఖర్ రెడ్డి పాత్రను మలయాళ సూపర్ స్టార్ మమ్ముట్టి పోషించారు. రాజశేఖర్ రెడ్డి పాదయాత్ర చేయడానికి పురుగొల్పిన అంశాలు, ఆయన చేసిన పాదయాత్ర, చివరికి ఎలా ముగిసింది, ఆయన ముఖ్యమంత్రి కావడం వంటి అంశాలు ఈ ‘యాత్ర’లో దర్శకుడు ప్రస్తావించారు. ఇప్పుడు రాజశేఖర్ రెడ్డి తనయుడు, వైసీపీ అధినేత, ఏపీ నూతన సీఎం జగన్‌మోహన్ రెడ్డి రాజకీయ ప్రయాణం నేపథ్యంలో ‘యాత్ర 2’ సినిమాను తెరకెక్కించేందుకు సిద్ధమవుతున్నారు. ఆంధ్రప్రదేశ్‌ ఎన్నికల్లో ఘనవిజయం సాధించి ముఖ్యమంత్రిగా జగన్ ప్రమాణస్వీకారం చేయనున్న నేపథ్యంలో ‘యాత్ర 2’కు సంబంధించిన విషయాలను దర్శకుడు మహి వి రాఘవ్ ట్విట్టర్ ద్వారా వెల్లడించారు. ‘వైఎస్‌ రాజా రెడ్డి, వైఎస్‌ జగన్‌ గురించి చెప్పకుండా వైఎస్‌ రాజశేఖర్‌ రెడ్డి కథ పూర్తి కాదు. ‘యాత్ర 2’ ఆయన కథను పరిపూర్ణం చేస్తుంది. వైఎస్సార్ యాత్ర తన తండ్రి సమాధి దగ్గర నుండి ప్రారంభమైంది. అలాగే జగన్‌ యాత్ర కూడా ప్రారంభమైంది’ అని రాఘవ్ ట్వీట్‌లో పేర్కొన్నారు. దీన్ని బట్టి వైఎస్సార్ సమాధి ఉన్న ఇడుపులపాయ నుంచి ‘యాత్ర 2’ మొదలవుతుందని స్పష్టంగా అర్థమవుతోంది. ఇదిలా ఉంటే, ‘యాత్ర 2’లో జగన్ పాత్రను తమిళ స్టార్ నటుడు సూర్య పోషించబోతున్నారనే వార్త గట్టిగా వినిపిస్తోంది. ఇదే విషయాన్ని గత రాత్రి  ప్రీ రిలీజ్ ఈవెంట్ కోసం హైదరాబాద్ వచ్చిన సూర్యను మీడియా అడిగింది. ‘జగన్ అన్న పాత్ర చేయడానికి నేను సిద్ధంగా ఉన్నాను. కానీ, ఇప్పటి వరకు నన్ను ఎవరూ సంప్రదించలేదు’ అని సూర్య సమాధానం ఇచ్చారు. అంటే, ఒకవేళ ఆ పాత్రకు సూర్యను సంప్రదిస్తే ఆయన కచ్చితంగా అంగీకరిస్తారని స్పష్టమవుతోంది. మరి మహి వి రాఘవ మనసులో నిజంగా సూర్య ఉన్నారో లేదో తెలియాలి. సోషల్ మీడియాలో అయితే చాలా మంది దుల్కర్ సల్మాన్ పేరును కూడా సూచిస్తున్నారు.