యువ్ న్యూస్ పొలిటికల్ బ్యూరో:
 

ఒడిశా ముఖ్యమంత్రిగా బీజేడీ అధినేత నవీన్ పట్నాయక్ వరుసగా ఐదోసారి బాధ్యతలు చేపట్టారు. ఆయనతో పాటు మరో 20 మంది మంత్రులు ప్రమాణస్వీకారం చేశారు. ఇటీవల జరిగిన ఎన్నికల్లో నవీన్ సారథ్యంలోని బిజూ జనతాదళ్ పార్టీ అఖండ విజయం సాధించిన విషయం తెలిసిందే. మొత్తం 147 స్థానాలున్న ఒడిశా శాసనసభలో 112 చోట్ల బీజేడీ అభ్యర్థులు గెలిచిన తిరుగులేని విజయం సాధించారు. ఒకసారి గెలవడమే గొప్ప విషయంగా మారిన ఈ సమయంలో వరుసగా ఐదుసార్లు విజయం సాధించడమంటే అంత ఆషామాషీ కాదు. పక్కనే ఉన్న ఆంధ్రప్రదేశ్‌లో 2014లో గెలిచిన టీడీపీ ఈసారి ఘోరపరాజయ్యాన్ని మూటగట్టుకుంది. ఒకే పార్టీని వరుసగా రెండుసార్లు గెలిపించే సంప్రదాయానికి వీడ్కోలు పలికి, నిర్మొహమాటంగా తిరస్కరించారు. కానీ పొరుగు రాష్ట్రమైన ఒడిశాలో నవీన్ పట్నాయక్‌ను మాత్రం వరుసగా ఐదోసారి సీఎం‌ను చేశారు. నవీన్ పట్నాయక్‌ పట్ల గ్రామీణ ప్రాంత ప్రజల్లో ముఖ్యంగా మహిళల్లో అమితమైన ఆదరణ ఉంది. అందుకే 2000, మార్చి 5 నుంచి ఇప్పటికీ ఆయనే సీఎం, మరో ఐదేళ్లు కూడా పట్నాయక్‌దే ముఖ్యమంత్రి పీఠం. నవీన్ పట్నాయక్ తండ్రి దివంగత బిజయానంద పట్నాయక్ రెండు పర్యాయాలు ఒడిశా సీఎంగా పనిచేశారు. ఆయన మరణం తర్వాత 1997లో బిజూ జనతాదళ్ పేరిట కొత్త రాజకీయ పార్టీని నవీన్ స్థాపించారు. తండ్రి ప్రాతినిథ్యం వహించిన అస్కా పార్లమెంటు స్థానం ఉపఎన్నికలో విజయం సాధించారు. ఇక, 2000 ఒడిశా శాసనసభ ఎన్నికల్లో బీజేపీతో కలిసి కూటమిగా నవీన్ పోటీచేశారు. ఆ ఎన్నికల్లో ఎన్డీఏ కూటమి 106 స్థానాల్లో విజయం సాధించడంతో నవీన్ తొలిసారి ముఖ్యమంత్రి పీఠాన్ని అధిరోహించారు. ఇక, ఏడాది ముందే 2004లో అసెంబ్లీని రద్దుచేసి ముందస్తుకు వెళ్లిన నవీన్ పట్నాయక్ బీజేపీతో కలిసి ప్రభుత్వాన్ని ఏర్పాటు చేశారు. అనంతరం జరిగిన పరిణామాలతో ఎన్డీఏ నుంచి నవీన్ బయటకొచ్చారు. 2009 ఎన్నికల్లో ఒంటరిగా పోటీచేసి 103 స్థానాల్లో విజయం సాధించారు. ఇక, 2014 నాటికి తన మెజార్టీని మరింత పెంచుకున్నారు. ఈ ఎన్నికల్లో స్వల్పంగా మెజార్టీ తగ్గినా మంచి విజయమే దక్కడం విశేషం. 2000 నుంచి ఇప్పటి వరకు ప్రతి ఎన్నికల్లోనూ బీజేడీ గ్రాఫ్ పెరగడం ఇక్కడ గుర్తుంచుకోవాల్సిన మరో అంశం. నవీన్ పట్నాయక్ విషయానికి వస్తే చాలా సాధారణంగా ఉంటారు. అవినీతికి ఆమడ దూరం. ఆయనెంత సింపుల్‌గా ఉంటారంటే.. పట్నాయక్ దగ్గర ఉండేవి రెండు జతల బట్టలు, చెప్పులు మాత్రమే. ఎలాంటి హంగు ఆర్భాటాల జోలికి వెళ్లరు. తన రాష్ట్రం తప్ప అనవసర వ్యవహారాల్లోకి తలదూర్చరు. తరచూ ప్ర‌కృతి వైపరిత్యాల బారినపడి తీవ్రంగా నష్టపోయే ఒడిశా ఆయన పాలనలో విపత్తులను ఎలా ఎదుర్కోవాలో అనేక పాఠాలను నేర్చుకుంది.నవీన్ తన సొంత రాష్ట్రం ఒడిశా బయటే పెరగడంతో మాతృభాష ఒడియా మాట్లాడటం రాదు. ఎన్నికల ప్రచార సభల్లో పట్నాయక్ తన ప్రసంగాలను ఇంగ్లిష్‌లో రాసుకొని మాట్లాడతారు. ఒడియా రాకపోవడం ఆయనకు ఓ రకంగా ప్లస్ అయ్యింది. ఎలాంటి వివాదాల జోలికి వెళ్లకపోవడానికి ఒడియా రాకపోవడం కూడా ఓ కారణమని చెబుతారు. మాతృభాషలో మాట్లాడలేకపోయినా ఒడిశా ప్రజలు నవీన్‌ను గెలిపించడానికి కారణం ఆయన వ్యక్తిత్వం, రాష్ట్రం పట్ల ఉండే ప్రేమ. ఇటీవల ఫణి తుఫాన్ ఒడిశాపై విరుచుకుపడి అపార నష్టం కలిగించింది. తుఫాను సాయం కింద సీఎంగా తన ఏడాది జీతాన్ని ఆయన విరాళంగా ఇచ్చి, తాను జనం కోసమేనని నిరూపించుకున్నారు.