యువ్ న్యూస్ జనరల్ బ్యూరో 
 

తాము అధికారంలోకి వస్తే ఏపీలోని ఒక్కో పార్లమెంటు నియోజకవర్గాన్ని ఓ జిల్లాగా ఏర్పాటుచేస్తామని వైసీపీ అధినేత హామీ ఇచ్చిన విషయం తెలిసిందే. అనుకున్నట్టుగానే సార్వత్రిక ఎన్నికల్లో వైసీపీ ఘన విజయం సాధించి అధికారం చేపడుతోంది. ఈ నేపథ్యంలో కొత్త జిల్లాల ఏర్పాటుపై వడివడిగా అడుగులు పడుతున్నాయి. కొత్త జిల్లాల ఏర్పాటు పరిశీలనలో భాగంగా రెవెన్యూ శాఖ వివరాలు కోరుతోంది. ముఖ్యంగా జిల్లా, రెవెన్యూ మండలాల వారీగా ఉన్న జనాభా, ఇతర సమాచారాన్ని వెంటనే పంపాలని కలెక్టర్లను కోరినట్టు రెవెన్యూ శాఖ వర్గాలు బుధవారం వెల్లడించాయి. రాష్ట్రంలో మొత్తం 25 పార్లమెంటు నియోజకవర్గాలు ఉన్నాయి. దీనికి అనుగుణంగా కొత్త జిల్లాలను ఏర్పాటు చేస్తే ప్రస్తుతం ఉన్నవాటి స్వరూపాన్ని మార్చాల్సి ఉంటుంది. దీని ప్రకారం ప్రస్తుతం ఉన్న 13 జిల్లాల్లో ఐదు, కొత్తగా ఏర్పాటు చేయాల్సిన 12 జిల్లాల్లో మరో ఐదింటికి ఎలాంటి ఇబ్బంది ఉండదు. మిగిలిన వాటి విషయంలో కొన్ని సమస్యలను అధికారులు గుర్తించారు. ప్రస్తుతం 51 రెవెన్యూ డివిజన్లు ఉండగా వాటిలో 25 పరంగా ఎలాంటి సమస్యలు లేవు. మిగతా 26డివిజన్‌ కేంద్రాల్లో మార్పులు చేయాల్సి ఆవశ్యకత ఉంది. బాపట్ల లోక్‌సభ నియోజకవర్గంలో సంతనూతలపాడు ఉంది. సంతనూతలపాడు మండలానికి చెందిన పేర్నమిట్ట ఒంగోలు నగరంలో అంతర్భాగంగా ఉంది. జిల్లా కేంద్రంగా బాపట్లను గుర్తిస్తే ఒంగోలు నగర పరిధిలో ఉన్న సంతనూతలపాడు మండల వాసులు అక్కడి వరకు వెళ్లాల్సి ఉంటుంది. గుంటూరు జిల్లా నరసరావుపేట పార్లమెంటు నియోజకవర్గాన్ని జిల్లాగా చేస్తే పల్నాడు ప్రాంతానికి అనువుగా ఉంటుంది. పెదకూరపాడు అసెంబ్లీ పరిధిలోని అమరావతి మండలవాసులకు దూరం అవుతుంది. పాణ్యం అసెంబ్లీలోని కొన్ని పంచాయతీలు కర్నూలు నగర పరిధిలో ఉన్నాయి. నంద్యాల పార్లమెంటు పరిధిలో పాణ్యం ఉంది. ఇలాంటి అంశాలను పరిశీలించాలి. గిరిజనులు అత్యధికంగా ఉన్న అరకు లోక్‌సభను జిల్లాగా గుర్తించడంలో పలు అంశాలు పరిశీలనకు వస్తున్నాయి. ఇది నాలుగు వివిధ జిల్లాల పరిధిలో విస్తరించి ఉంది. దీన్ని ఒక జిల్లాగా గుర్తిస్తే పరిపాలనాపరంగా సమస్యలు వస్తాయి. కాబట్టిన అరకును 2 జిల్లాలుగా చేయాల్సి ఉంటుంది.వివిధ కోణాల నుంచి రెవెన్యూ శాఖ వివరాలను జిల్లా అధికారుల నుంచి కోరుతూ పార్లమెంటు నియోజకవర్గాలను జిల్లాలుగా గుర్తించడంలో ఉన్న సమస్యలు, తీసుకోవాల్సిన చర్యలపై కసరత్తు జరుగుతోంది. కొత్త జిల్లాలను ప్రకటించాలంటే అనేక అంశాలను పరిగణనలోనికి తీసుకోవాలి. ముఖ్యంగా అన్ని శాఖలు ఏర్పడాలి.. కొత్తగా నియామకాలు చేపట్టాలి. ఆర్థికపరమైన అంశాలను పరిశీలించాలి.