తెలుగు ప్రేక్షకులతో లేడీ సూపర్ స్టార్‌గా పిలుపించుకున్న విజయశాంతి రాజకీయాల్లోకి వెళ్లిన తరవాత సినిమాలకు దూరమైపోయారు. 2006లో వచ్చిన ‘నాయుడమ్మ’ సినిమాలో ఆమె చివరిగా కనిపించారు. ఆ తరవాత మరే సినిమాను ఆమె అంగీకరించలేదు. అయితే, 13 ఏళ్ల విరామం తరవాత విజయశాంతి మళ్లీ మేకప్ వేసుకోబోతున్నారు. మహేష్ బాబు, అనిల్ రావిపూడి కాంబినేషన్‌లో తెరకెక్కబోతోన్న ‘సరిలేరు నీకెవ్వరు’ సినిమాతో విజయశాంతి రీఎంట్రీ ఇస్తున్నారు. ఈ విషయాన్ని దర్శకుడు అనిల్ రావిపూడి స్వయంగా ప్రకటించారు. మహేష్ బాబు 26వ చిత్రంగా తెరకెక్కబోతోన్న ‘సరిలేరు నీకెవ్వరు’ ప్రారంభోత్సవం శుక్రవారం హైదరాబాద్‌లో జరిగింది. ఈ సందర్భంగా చిత్ర యూనిట్ మీడియా సమావేశం నిర్వహించింది. ఈ సమావేశంలో నిర్మాతలు దిల్ రాజు, రామబ్రహ్మం సుంకర, దర్శకుడు అనిల్ రావిపూడి, సంగీత దర్శకుడు దేవిశ్రీ ప్రసాద్, హీరోయిన్ రష్మిక మందన తదితరులు పాల్గొన్నారు. ఈ సందర్భంగా అనిల్ రావిపూడి మాట్లాడుతూ చిత్ర తారాగణం వివరాలను వెల్లడించారు. తమ సినిమాలో చేయడానికి అంగీకరించిన విజయశాంతికి కృతజ్ఞతలు తెలిపారు.