యువ్ న్యూస్ పొలిటికల్ బ్యూరో:   
 

దేశ ప్రధానిగా నరేంద్ర మోదీతోపాటు 58 మంది మంత్రులుగా ప్రమాణం చేశారు. గతంలో మంత్రులుగా పని చేసిన పలువురిని పక్కనబెట్టిన మోదీ.. ఈసారి 20 కొత్త ముఖాలకు మంత్రివర్గంలో చోటు కల్పించారు. నూతన మంత్రివర్గ ఎంపికపై మోదీ మార్క్ స్పష్టంగా కనిపించింది. విదేశాంగ కార్యదర్శిగా పని చేసిన జైశంకర్‌ను కేబినెట్‌లోకి తీసుకున్న మోదీ.. ఆయనకు విదేశీ వ్యవహారాల శాఖను కట్టబెట్టారు. మోదీ మంత్రివర్గంలో ఆకట్టుకున్న మరో పేరు ప్రతాప్ చంద్ర సారంగి. ఒడిశాలోని బాలసోర్ నుంచి తొలిసారి ఎంపీగా గెలుపొందిన ఆయన మంత్రిగా ప్రమాణ స్వీకారం చేయడానికి వస్తుంటే.. బీజేపీ నాయకులంతా హర్షధ్వానాలు చేశారు. ఒడిశా మోదీ అని పిలుచుకునే ప్రతాప్ చంద్ర సారంగి 1955లో నీలగిర్ ప్రాంతంలో జన్మించారు. డిగ్రీ చదువుకున్న ఆయన రామకృష్ణ మఠంలో చేరి సన్యాసిగా మారాలని భావించారు. కానీ ఒంటరిగా ఉండే తల్లి బాధ్యతలను చూసుకొమని మఠంలోని స్వామీజీలు చెప్పడంతో వెనక్కి వచ్చారు. 28 ఏళ్ల వయసులో ఆరెస్సెస్‌లో చేరిన ఆయన బ్రహ్మచారి. బాలాసోర్, మయూర్ భంజ్ జిల్లాల్లోని గిరిజన గ్రామాల్లో పాఠశాలలను ప్రారంభించి.. విద్యా వికాసానికి కృషి చేశారు. ప్రతాప్ చంద్ర సారంగి తన తల్లితో కలిసి పూరి గుడిసెలో ఉండేవారు. కానీ ఏడాది క్రితం ఆయన తల్లి మరణించడంతో ప్రస్తుతం అదే ఇంట్లో ఒంటరిగా ఉంటున్నారు. పేరుకు ఒంటరి కానీ.. నిత్యం కలవడానికి వచ్చే వారితో ఆ ఇల్లు సందడిగా ఉంటుంది. కొద్ది దూరం ప్రయాణాలకు సైకిల్ మీద, దూరం ఎక్కువైతే ఆర్టీసీ బస్సుల్లో వెళ్తుంటారాయన. రెండు జతల కుర్తా పైజామా, స్లిప్పర్లతో అత్యంత నిరాడంబర జీవితాన్ని గడిపే ఆయన్ను అక్కడి ప్రజలు ‘నానా’గా పిలుచుకుంటారు. నానా 2004లో బీజేపీ తరఫున నీలగిర్ ఎమ్మెల్యేగా గెలిచారు. 2009లో బీజేపీ అభ్యర్థిగా నామినేషన్ వేయడానికి బస్సులో వెళ్తూ తన బ్యాగ్ పొగొట్టుకున్నారు. దీంతో ఇండిపెండెంట్‌గా నామినేషన్ వేసి గెలుపొందారు. 2014లో బాలాసోర్ ఎంపీగా పోటీ చేసి ఓడిపోయారు. ఈసారి బీజేడీ అభ్యర్థి రబీంద్ర జెనా, ఒడిశా పీసీసీ అధ్యక్షుడు నిరంజన్ పట్నాయక్ కుమారుడిని ఆయన ఓడించారు. వీరిద్దరూ సంపన్నులు, కోట్లు ఖర్చుపెట్టే సామర్థ్యం ఉన్నవారు. తన ప్రత్యర్థులు ఎస్‌యూవీల్లో ఎన్నికల ప్రచారం నిర్వహిస్తుంటే.. నానా మాత్రం ఆటో రిక్షాలో ప్రచారం చేసి గెలిచారు. ధన బలాన్ని ఓడించిన ప్రజాబలం ఆయన సొంతం. 35 ఏళ్లుగా ప్రజల్లో ఒకడిగా మమేకమైతూ జీవిస్తున్న నానా.. తనకొచ్చే జీతంలో ఎక్కువ భాగాన్ని తిరిగి ప్రజా సంక్షేమానికే ఖర్చు పెడతారు. అలాంటి మంచి వ్యక్తికి ఎంపీగా ఎన్నికైన తొలిసారే.. మోదీ మంత్రివర్గంలో మధ్య, చిన్న తరహా పరిశ్రమలు, పాడి పశుగణాభివృద్ధి శాఖ సహాయ మంత్రి పదవి దక్కింది.