సార్వత్రిక ఎన్నికల్లో కర్ణాటకలోని 28 లోక్‌సభ స్థానాలకు గానూ బీజేపీ 25 చోట్ల విజయం సాధించింది. అయితే, లోక్‌సభ ఎన్నికల తర్వాత వారం రోజుల వ్యవధిలో నిర్వహించిన మున్సిపల్ ఎన్నికల్లో బీజేపీకి ఓటర్లు షాక్ ఇచ్చారు. ఈ ఎన్నికల్లో అధికార కాంగ్రెస్- జేడీఎస్ కూటమి విజయ దుందుభి మోగించింది. పార్లమెంటు ఎన్నికల్లో కుదేలైన కాంగ్రెస్‌కు పురపాలిక ఎన్నికలు ఊపిరులూదాయి. మే 29 ఎనిమిది నగర పాలక సంస్థలు, 33 పట్టణ మున్సిపాల్టీలకు ఎన్నికలు నిర్వహించారు. ఈ ఫలితాలు శుక్రవారం వెల్లడి కాగా మొత్తం 1,221 వార్డులకుగాను కాంగ్రెస్‌ 509, బీజేపీ 366, జేడీఎస్‌ 174 వార్డుల్లో గెలుపొందగా, స్వతంత్రులు, ఇతరులు 167 స్థానాలను దక్కించుకున్నారు. మొత్తం 31 పురపాలికల్లో కాంగ్రెస్‌ 13, బీజేపీ 5, జేడీఎస్‌ 2, ఇతరులు 11 స్థానాల్లో ఆధిక్యత సాధించారు. అయితే, 18 నగర పంచాయతీల్లో బీజేపీ 8, కాంగ్రెస్‌ 3 చోట్ల గెలుపొందగా, 7 స్థానాల్లో ఎవ్వరికీ పూర్తి మెజార్టీ రాలేదు. నగర పంచాయితీల్లోని 290 వార్డులకు గానూ బీజేపీ 126, కాంగ్రెస్ 97, జేడీఎస్ 34, స్వతంత్రులు 33 చోట్ల గెలుచుకున్నాయి. ఫలితాలపై కర్ణాటక మాజీ సీఎం సిద్ధరామయ్యా మాట్లాడుతూ.. ఈ ఎన్నికలు ఓటర్ల నాడికి నిదర్శనమని వ్యాఖ్యానించారు. కానీ, తమకు పట్టున్నచోట్ల బీజేపీ నెగ్గిందని ఆ పార్టీ నేత యడ్యూరప్ప పేర్కొన్నారు. కర్ణాటక మున్సిపల్ ఫలితాలపై ఆ పార్టీ రాష్ట్ర అధ్యక్షుడు దినేశ్ గుండూ రావు ట్విట్టర్ ద్వారా స్పందించారు. ‘కర్ణాటక మున్సిపాల్టీ ఎన్నికల్లో మొత్తం 1221 వార్డులకు గానూ కాంగ్రెస్ 509 చోట్ల విజయం సాధించి, 42 శాతం సీట్లను గెలుపొందింది. కర్ణాటక ప్రజలు కాంగ్రెస్ వెన్నంటే ఉన్నారనడానికి ఇదే ప్రత్యక్ష ఉదాహరణ.. లోక్‌సభ ఎన్నికల్లో అఖండ విజయం సాధించిన బీజేపీ వెనుకబడటం ఎంతో ఆశ్చర్యానికి గురిచేసింది.. దీనిపై పరిశీలన చేయాల్సిన అవసరం ఉంది’ అని రాహుల్ వ్యాఖ్యానించారు.