.jpg)
యువ్ న్యూస్ జనరల్ బ్యూరో
దేశంలో మహిళలపై లైంగిక దాడులు నానాటికీ పెరిగిపోతున్నాయి. ప్రభుత్వాలు ఎన్ని చట్టాలు తెచ్చినా, ఎందరికి కఠినశిక్షలు పడినా కామాంధులు రెచ్చిపోతూనే ఉన్నారు. అక్కడ మహిళలకు బయటే కాదు.. ఇంట్లోనూ రక్షణ లేకుండా పోయింది. తాజాగా వెలుగులోకి వచ్చిన ఓ ఘటన ఉత్తర్‌ప్రదేశ్‌లో పరిస్థితులు ఎంత దారుణంగా ఉన్నాయో కళ్లకు కడుతోంది. ఉత్తరప్రదేశ్‌లోని షాజహాన్‌పూర్‌లో నీలేష్, శ్యామ్‌పాల్ అనే ఇద్దరు యువకులు ఏప్రిల్ 10న ఓ ఇంట్లోకి చొరబడ్డారు. భర్తను స్తంభానికి కట్టేసి మహిళపై సామూహిక అత్యాచారానికి పాల్పడ్డారు. అంతేకాకుండా ఆ దారుణాన్ని వీడియో తీసి పైశాచికానందాన్ని పొందారు. అయితే ఈ దారుణాన్ని నలుగురికీ చెబితే తమ పరువు పోతుందని ఆ భార్యాభర్తలు మిన్నకుండిపోయారు. అయితే దుండగులు ఆ వీడియోను ఇటీవల సోషల్‌మీడియాలో పోస్ట్ చేయడంతో వైరల్‌గా మారింది. అత్యంత దారుణంగా ఉన్న ఆ వీడియో పోలీసులకు చేరడంతో వారు రంగంలోకి దిగారు. బాధితులను గుర్తించి ఆరా తీయగా వారు జరిగిన దారుణాన్ని చెప్పుకుని కన్నీరుమున్నీరయ్యారు. దీంతో పోలీసులు కేసు నమోదు చేసి నిందితులను కటకటాల్లోకి నెట్టారు.