ఆంధ్రప్రదేశ్‌ నూతన పోలీస్‌ డైరెక్టర్‌ జనరల్‌ (డీజీపీ)గా గౌతం సవాంగ్‌ ఈరోజు బాధ్యతలు స్వీకరించారు. రాష్ట్ర విభజన అనంతరం నవ్యాంధ్రలో బాధ్యతలు స్వీకరించిన ఐదో అధికారి ఆయన. మంగళగిరిలోని డీజీపీ కార్యాలయానికి విచ్చేసిన గౌతం సవాంగ్‌ తొలుత పోలీసుల గౌరవ వందనం స్వీకరించారు. అనంతరం కార్యాలయంలోకి అడుగుపెట్టి బాధ్యతలు చేపట్టారు. ఈ సందర్భంగా పలువురు పోలీసు అధికారులు సవాంగ్‌ను అభినందించారు. అనంతరం మాట్లాడుతూ రాష్ట్ర ప్రభుత్వం తనపై గురుతరమైన బాధ్యత ఉంచిందని, దానిని చిత్తశుద్ధితో నిర్వహిస్తానని అన్నారు. ఏపీ పోలీసులకు దేశంలోనే మంచి గుర్తింపు ఉందని, అటువంటి శాఖకు డీజీపీగా రావడం చాలా ఆనందంగా ఉందన్నారు.ఏపీ సీఎంగా జగన్ ప్రమాణస్వీకారం చేసిన తర్వాత ఉన్నతస్థాయిలో కొత్త అధికారులను తీసుకువస్తున్నారు. ఈ క్రమంలో రాష్ట్ర నూతన డీజీపీగా సీనియర్ ఐపీఎస్ అధికారి గౌతమ్ సవాంగ్ ఇవాళ బాధ్యతలు స్వీకరించారు. మంగళగిరిలోని డీజీపీ కార్యాలయంలో ఆయన అధికారికంగా విధినిర్వహణలో అడుగుపెట్టారు. ఈ సందర్భంగా సవాంగ్ మాట్లాడుతూ, పోలీసు శాఖ తమకోసమే ఉందని ప్రజలు అనుకునేలా చేస్తామని హామీ ఇచ్చారు. ప్రత్యేకంగా మహిళలు, చిన్నారులపై లైంగిక దాడులను అరికట్టేందుకు ప్రత్యేకంగా చర్యలు తీసుకుంటామని స్పష్టం చేశారు. రోడ్డు ప్రమాదాల నివారణ, శాంతిభద్రతలు తమ ప్రాధాన్యత అంశాల్లో భాగమని చెప్పారు.ముఖ్యంగా, సామాన్యుడికి ఎప్పుడూ పోలీసు శాఖ అందుబాటులో ఉండేవిధంగా విధివిధానాలు ఉంటాయని సవాంగ్ వెల్లడించారు. కాగా, డీజీపీ బాధ్యతలు స్వీకరించేందుకు సవాంగ్ తన భార్యాబిడ్డలతో కలిసి వచ్చారు. ఆయన బాధ్యతలు స్వీకరిస్తున్నట్టు సంతకం పెట్టగానే కుమార్తె వచ్చి ఆనందంతో తండ్రిని హత్తుకున్నారు. భార్య కూడా పక్కన వచ్చి నిలబడి సంతోషంతో చిరునవ్వులు చిందించారు. ఏపీ పోలీస్ బాస్ గా విధుల్లో అడుగుపెట్టిన ఈ సీనియర్ ఐపీఎస్ అధికారికి అభినందనలు వెల్లువెత్తాయి. పోలీసు ఉన్నతాధికారులు ఆయనకు పుష్పగుచ్ఛాలు అందించి శుభాకాంక్షలు తెలిపారు.
జగన్ అభినందన
రాష్ట్ర నూతన డీజీపీగా గౌతమ్ సవాంగ్ బాధ్యతలు స్వీకరించిన నేపథ్యంలో సీఎం జగన్ శుభాకాంక్షలు తెలిపారు. "ఆంధ్రప్రదేశ్ కొత్త డీజీపీగా విధులు చేపట్టిన దామోదర్ గౌతమ్ సవాంగ్ కు శుభాకాంక్షలు. మీతో కలిసి పనిచేయడానికి సిద్ధంగా ఉన్నాను" అంటూ జగన్ ఫేస్ బుక్ లో పోస్టు పెట్టారు. అంతేకాకుండా, పుష్పగుచ్ఛం అందిస్తున్నట్టుగా ఉన్న ఓ ఫొటోను కూడా పోస్టు చేశారు. ఆర్పీ ఠాకూర్ స్థానంలో గౌతమ్ సవాంగ్ డీజీపీగా నియమితుడైన సంగతి తెలిసిందే. వైసీపీ ఎన్నికల్లో ఘనవిజయం సాధించినప్పటినుంచే గౌతమ్ సవాంగ్ నూతన పోలీస్ బాస్ అంటూ వార్తలు వచ్చాయి.