ఇంగ్లాండ్ వేదికగా జరుగుతున్న ప్రపంచకప్ 2019లో ఒక్క భారత్ తప్ప అన్ని జట్లూ మ్యాచ్‌లు వరుసగా ఆడేస్తున్నాయి. టోర్నీ మొదలై ఐదు రోజులు గడుస్తున్నా.. భారత్ ఇప్పటి వరకూ ఎంట్రీ ఇవ్వలేదు. మరో రెండు రోజుల్లో అంటే బుధవారం.. దక్షిణాఫ్రికాతో తొలి మ్యాచ్‌లో టీమిండియా మొదటి మ్యాచ్ ఆడనుంది. మరోవైపు దక్షిణాఫ్రికాకి అది టోర్నీలో మూడో మ్యాచ్ కానుంది. దీనిబట్టే అర్థం చేసుకోవచ్చు.. టీమిండియా ఎంత ఆలస్యంగా కప్ వేట ప్రారంభించనుందోనని..! వాస్తవానికి ప్రపంచకప్‌లో భారత్ జట్టు లేట్ ఎంట్రీకి కారణం భారత క్రికెట్ నియంత్రణ మండలి (బీసీసీఐ). ఎలా అంటే.. ఐపీఎల్ 2019 సీజన్‌లో నెలన్నరపాటు అవిశ్రాంతంగా క్రికెట్ ఆడిన భారత్ ఆటగాళ్లకి కొంచెం రెస్ట్ కావాలని స్వయంగా అంతర్జాతీయ క్రికెట్ కౌన్సిల్ (ఐసీసీ)ని బీసీసీఐ అభ్యర్థించింది. దీంతో.. భారత్ మ్యాచ్‌ల షెడ్యూల్‌ని సవరించిన ఐసీసీ.. టోర్నీ మొదలైన వారం తర్వాత టీమిండియా తొలి మ్యాచ్ ఆడేలా రూపొందించింది. మార్చి 23న మొదలైన ఐపీఎల్ 2019 సీజన్ మే 12న ఫైనల్‌తో ముగిసిన విషయం తెలిసిందే. మూడేళ్ల క్రితం సుప్రీంకోర్టు నియమిత లోధా కమిటీ.. టీమిండియా ఆడే టోర్నీ, టోర్నీకి మధ్య కనీసం 15 రోజులు గ్యాప్ ఉండాలని సిఫారసు చేసింది. దీంతో.. ఐపీఎల్ 2019, ప్రపంచకప్‌ 2019 మధ్య ఈ వ్యవధి నియమాన్ని బీసీసీఐ పాటించినప్పటికీ.. ఆటగాళ్లకి మరింత విశ్రాంతి ఇవ్వాలనే ఉద్దేశంతో ఐసీసీని అభ్యర్థించింది. ఈ బ్రేక్ టైమ్.. ఆటగాళ్ల ప్రాక్టీస్‌తో గాయపడిన క్రికెటర్లు ఫిట్‌నెస్ సాధించుకోవడానికి కూడా బాగా ఉపయోగపడింది. ఐపీఎల్‌లో గాయపడిన కేదార్ జాదవ్‌.. ఇప్పటికే పూర్తి ఫిట్‌నెస్ సాధించినట్లు కనిపిస్తున్నాడు. ఆదివారం జిమ్‌లో టీమిండియా ఆటగాళ్లతో పోటాపోటీగా అతను కసరత్తులు చేశాడు. మే 30న ప్రారంభమైన ప్రపంచకప్‌ని 11 వేదికల్లో 46 రోజుల పాటు నిర్వహించనుండగా.. మొత్తం 48 మ్యాచ్‌లు జరగనున్నాయి. జూలై 14న లార్డ్స్‌లో ఫైనల్‌తో టోర్నీ ముగియనుంది. డే మ్యాచ్‌లు భారత కాలమానం ప్రకారం మధ్యాహ్నం 3 గంటలకు ప్రారంభమవుతాయి. రౌండ్ రాబిన్ పద్ధతిలో భాగంగా ప్రతి జట్టు లీగ్ దశలో 9 మ్యాచ్‌ల్లో తలపడుతుంది. పాయింట్ల పట్టికలో తొలి నాలుగు స్థానాల్లో నిలిచిన జట్లు సెమీస్‌కు అర్హత సాధిస్తాయి.