యువ్ న్యూస్ ఫిల్మ్ బ్యూరో:

సినిమాకు వైవిధ్యం కనబరిచే తమిళ నటుల్లో ధనుష్ ఒకరు. బక్కపలచని శరీరంతో చూడటానికి పెద్దగా హీరోలానే ఉండరు. కానీ, తన నటన, ఫైట్లు, డ్యాన్స్‌లతో తమిళ ప్రేక్షకులను మెప్పించారు.
కేవలం తమిళంలోనేనా తెలుగులోనూ ఆయనకి అభిమానులున్నారు. ఆరేళ్ల క్రితం ధనుష్ బాలీవుడ్‌లోనూ ఎంట్రీ ఇచ్చారు. తొలి చిత్రంతోనే బాలీవుడ్‌లో రూ.100 కోట్ల క్లబ్‌లో చేరిపోయారు. కండలు తిరిగిన బాడీలతోనే కాదు బక్కపలచని శరీరంతోనూ రూ.100 కోట్లు వసూలు చేయొచ్చని ‘రాన్‌ఝానా’తో ధనుష్ నిరూపించారు. హిందీ, తమిళం, తెలుగులో మంచి గుర్తింపు సంపాదించుకున్న ధనుష్ ఇప్పుడు హాలీవుడ్‌కు వెళ్తున్నారు. ‘ది ఎక్స్‌ట్రార్డినరీ జర్నీ ఆఫ్ ది ఫకీర్’ అనే సినిమాతో ధనుష్ హాలీవుడ్‌లో ఎంట్రీ ఇస్తున్నారు. ఈనెల 21న ఈ చిత్రం విడుదలవుతోంది. ఈ సినిమా ట్రైలర్‌ను తాజాగా విడుదల చేశారు. టైటిల్‌లో చెప్పినట్టుగానే ఈ సినిమాలో ధనుష్ ఫకీర్ పాత్రలో కనిపిస్తారు. పేరు అజాతుశత్రు లావష్ పటేల్. ముంబై‌లోని మురికి వాడల్లో పుట్టిన పటేల్ అక్కడి నుంచి పారిస్ ఎలా వెళ్లాడు, అక్కడ ప్రేమించిన అమ్మాయి కోసం ఏం చేశాడు అనేదే సినిమా. ట్రైలర్ చూస్తుంటే సినిమా ఆద్యంతం కామెడీగా ఉంటుందని అర్థమవుతోంది. సినిమాలో ధనుష్ మినహా మిగిలినవారంతా హాలీవుడ్ నటులే. కెనడాకు చెందిన కెన్ స్కాట్ ఈ చిత్రానికి దర్శకత్వం వహించారు. రోమెయిన్ ప్యూర్టోలస్ రాసిన ‘ది ఎక్స్‌ట్రార్డినరీ జర్నీ ఆఫ్ ది ఫకీర్’ నవల ఆధారంగా ఈ సినిమాకు తెరకెక్కించారు. నఖిలీ పత్రాలతో పారిస్ వెళ్లిన ఫకీర్ పటేల్ అక్కడి నుంచి అనుకోకుండా వాడ్రోబ్‌లో స్పెయిన్, యూకే, ఇటలీ, లిబియాలకు వెళ్లిపోతాడు. అక్కడి నుంచి ప్రేమించిన అమ్మాయి కోసం మళ్లీ పారిస్ ఎలా వచ్చాడు అనేదే కథ. ఈ సినిమాను ఇంగ్లిష్‌తో పాటు తమిళంలోనూ విడుదల చేస్తున్నారు. ‘పక్కిరి’ అనే పేరుతో తమిళంలో విడుదలవుతోంది