‘ఆరెక్స్ 100’ కంటే పదిరెట్లు పెద్ద హిట్ అవుతుందని ప్రీ రిలీజ్‌లో ప్రామిస్ చేసిన కార్తీకేయ తన మాటను నిలబెట్టుకున్నాడో లేదో సమీక్షలో తెలుసుకుందాం. సూర్య, భూమికతో ‘నువ్వు నేను ప్రేమ’ చిత్రాన్ని రూపొందించిన టి.ఎన్. కృష్ణ రొమాంటిక్ కామెడీగా ‘హిప్పీ’ చిత్రాన్ని రూపొందించారు. దిగంగన సూర్యవంశీ అనే ముంబై బ్యూటీని ఈ సినిమాతో హీరోయిన్‌గా పరిచయం చేశారు. జజ్బా సింగ్ సెకండ్ హీరోయిన్‌గా నటించింది. తెలుగు, తమిళ భాషల్లో ఒకేసారి నిర్మితమైన ఈ చిత్రాన్ని ప్రముఖ తమిళ నిర్మాత కళైపులి ఎస్.థాను భారీ బడ్జెట్‌తో నిర్మించడం విశేషం. ఇక ఈ సినిమా కథ విషయానికి వస్తే.. దేవదాస్ (హిప్పీ) బాక్సర్‌గా ఉంటూ జేడీ చక్రవర్తి సాఫ్ట్ వేర్ కంపెనీలో స్పోర్ట్స్ కోటాలో ఉద్యోగిగా పనిచేస్తుంటాడు. ఇంజనీరింగ్ పూర్తి చేసి మార్షల్ ఆర్ట్స్ ప్రాక్టీస్ చేస్తున్న సమయంలో స్నేహ (జబ్బా సింగ్) ప్రేమలో పడతాడు. ఆమెతో గోవాకి లాంగ్ డ్రైవ్‌కి వెళ్లిన సందర్భంలో స్నేహ ఫ్రెండ్ ఆముక్త మాల్యద (దిగంగన సూర్యవంశీ)ని చూసి తొలి చూపులోనే ప్రేమలో పడతాడు హిప్పీ. స్నేహ.. హిప్పీ ప్రేమకోసం పరితపిస్తే.. హిప్పీ మాత్రం ఆముక్త మాల్యదను లవ్‌లో పడేయడం కోసం ప్రయత్నిస్తాడు. ఈ ప్రయత్నంలో
స్నేహ మరో వ్యక్తిని పెళ్లాడగా.. ఆముక్త మాల్యద ప్రేమను పొందిన హిప్పీకి అసలు తిప్పలు మొదలౌతాయి. ఆ తిప్పల్ని భరించలేక తిరిగి ఆముక్త మాల్యదను వదిలించుకునేందుకు ప్రయత్నాలు చేస్తాడు హిప్పీ. వాటిని తిప్పుకొడుతూ చుక్కలు చూపిస్తుంది ఆముక్త మాల్యద. ఈ టామ్ అండ్ జెర్రీ ‘హిప్పీ’ ప్రేమకథ చివరకి ఎలా సుఖాంతం అయ్యింది? ‘హిప్పీ’ని పప్పీ చేసి ఆముక్త మాల్యద ఎలా ఆడుకుంది? అన్నదే మిగతాకథ. దర్శకుడు టి.ఎన్. కృష్ణ ‘హిప్పీ’ చిత్రంతో యూత్‌ని టార్గెట్ చేశారు. లవ్, రొమాన్స్, లివింగ్ రిలేషన్‌షిప్ నేపథ్యంలో ప్రజెంట్ ట్రెండ్‌కి అనుగుణంగా కథను అల్లుకున్నప్పటికీ ఓ పదేళ్ల తరువాతి జనరేషన్ ఎలా ఉండబోతుందో అతని ఆలోచనల్లో చూపించారు. ‘మా ఇంట్లో పెళ్లి సంబంధాలు చూస్తున్నారు వచ్చి నన్ను ఎక్కడికైనా తీసుకుపో’ అని ఫోన్ చేసి ఇంట్లో నుండి లేచిపోయి వచ్చిన హీరోయిన్‌ని కాదని మరో హీరోయిన్ ప్రేమలో పడటమే హీరోయిజంగా చూపించారు. ఇది ఎంతవరకూ ఆడియన్స్ యాక్సెప్ట్ చేస్తారన్న విషయాన్ని పక్కనపెడితే.. ‘ఒకమ్మాయిని మనం లవ్ చేస్తే.. ప్యారడైజ్ బిగిన్స్. అదే అమ్మాయి మనల్ని తిరిగి లవ్ చేయడం స్టార్ట్ చేస్తే.. మై ప్యారడైజ్ లాస్ట్’ అన్న జాన్‌ మిల్టన్‌ సూత్రాన్ని ఆధారంగా చేసుకుని ట్రెండీగా దర్శకుడు ఈ కథను అల్లుకున్నారు. అయితే రొమాంటిక్ సన్నివేశాలు, లిప్ లాక్‌లు, మితిమీరిన శృంగార సన్నివేశాలను మిక్స్ చేసి యూత్‌కి మాత్రమే ఈ సినిమాని పరిమితం చేశారు. తొలి నుండి కథను స్లోగా నడిపిన దర్శకుడు క్లైమాక్స్‌లో సరైన ముగింపు ఇవ్వలేకపోయారు. RX 100’ చిత్రంతో తిరుగులేని క్రేజ్ సంపాదించిన కార్తీకేయ.. తన రెండో చిత్రం కోసం గట్టిగానే కష్టపడ్డాడు. సిక్స్ ప్యాక్స్‌లో ప్లే బాయ్ అవతారంలో డిఫరెంట్ షేడ్స్ ఉన్న పాత్రలో కనిపించారు. నాలుగు రకాల గెటప్స్‌లో వేరియేషన్స్ చూపించారు. డాన్స్, ఫైట్స్, డైలాగ్ డెలివరీతో ఆకట్టుకున్నాడు. ఈ చిత్రంతో హీరోయిన్‌గా పరిచయమైన దిగంగన సూర్యవంశీ అందం, అభినయంతో ఆకట్టుకుంది. సెకండ్ హీరోయిన్‌గా నటించిన జబ్బా సింగ్ బోల్డ్ పాత్రకే పరిమితం అయ్యింది. అందాలను ఆరబోసి రొమాంటిక్ సన్నివేశాలకు పరిమితం అయ్యింది. ఇక ఈ చిత్రంలో ‘నేను పెళ్లి చేసుకునే మెటీరియల్ కాదు’ అంటూ ముదురు వయసు సాఫ్ట్ వేర్ కంపెనీ బాస్‌గా కనిపించిన జేడీ చక్రవర్తి చాలా రోజుల తరువాత ఫుల్ లెంగ్త్ రోల్‌లో నటించి పరిధిమేర ఆకట్టుకునే ప్రయత్నం చేశారు. ‘కుక్కలు ప్రేమను నాకి చూపిస్తాయి.. సింహం కొరికి చూపిస్తుంది.. మనుషులు గొడవపడి చూపిస్తారు’ లాంటి డైలాగ్స్ పేలాయి. అయితే చాలా చోట్ల డబుల్ మీనింగ్ డైలాగ్‌తో ప్రేక్షకుల్ని ఇబ్బంది పెట్టాడు. తెలంగాణ యాసలో డైలాగ్‌ల కోసం బాగానే కష్టపడ్డాడు. వెన్నెల కిషోర్ కామెడీ రొటీన్‌గా అనిపిస్తుంది. బిగ్ బాస్ ఫేమ్ హరితేజ క్యారెక్టర్ కూడా పెద్దగా ఆకట్టుకోలేకపోయింది. బ్రహ్మాజీ కామెడీ బాగుంది. హీరోయిన్ శ్రద్ధాదాస్ ఉన్న కాసేపు అందాలతో కనువిందు చేసింది. నివాస్ ప్రసన్న సాంగ్స్‌తో పర్వాలేదనిపించారు. భారంగా సాగుతున్న కథకు కొన్ని పాటలు అడ్డంగా తగిలాయి. బ్యాగ్రౌండ్ మ్యూజిక్ కూడా ఓ మోస్తరుగా ఉంది. కేఎల్ రాజశేఖర్ సినిమాటోగ్రఫీ బాగుంది. విజువల్స్ చాలా రిచ్‌గా ఉన్నాయి. ముఖ్యంగా హీరోయిన్స్‌ని చాలా గ్లామరస్‌గా చూపించారు. రొమాంటిక్, లిప్ లాక్ సన్నివేశాలపై ప్రత్యేక దృష్టిపెట్టారు. దిలీప్ సుబ్రహ్మణ్యం స్టంట్స్‌ బాగున్నాయి. ఎడిటర్‌ కే ఎల్ ప్రవీణ్ తన కత్తెరకు ఇంకాస్త పని చెప్పాల్సింది. చాలా సన్నివేశాలు బోరింగ్‌గా అనిపిస్తాయి