పీ కేబినెట్‌పై తనదైన మార్క్ వేశారు ఆంధ్రప్రదేశ్ ముఖ్యమంత్రి వైఎస్ జగన్‌మోహన్ రెడ్డి. అనుభవంతో పాటూ యువతకు పెద్దపీట వేశారు. అలాగే కష్ట సమయాల్లో పార్టీకి వెన్నంటి ఉండి.. తొమ్మిదేళ్ల పాటూ పోరాటాలు చేసిన నేతలకు జగన్ మంత్రివర్గంలో అవకాశం కల్పించారు. విధేయతకు ప్రాధాన్యమిస్తూ మంత్రివర్గంలో చోటు కల్పించి తండ్రికి తగ్గ తనయుడు అనిపించుకున్నారు. వైఎస్‌కు నమ్మిన బంటుల్లా ఉన్నవారు.. వైసీపీ స్థాపించిన తర్వాత తన వెంట నడిచి వచ్చినవారికి కూడా బెర్త్‌లు కేటాయించారు. ఇలా పార్టీకి విధేయుల్లా ఉండి పదవులు దక్కించుకున్నవారిలో నాని ‘త్రయం’(కొడాలి నాని, ఆళ్ల నాని, పేర్ని నాని)ఉంది. ఈ ముగ్గురు సరిగ్గా ఆరేళ్ల క్రితం జగన్ వెంట నడిచి తమ ఎమ్మెల్యే పదవులు పోగొట్టుకున్నారు. తిరిగి అదే రోజు మళ్లీ మంత్రి పదవి దక్కించుకొన్నారు. ప్రమాణ స్వీకారానికి ముందు మీడియాతో మాట్లాడిన కొడాలి నాని, పేర్ని నాని జగన్‌తో ఉన్న అనుబంధాన్ని గుర్తు చేసుకున్నారు. ఎమ్మెల్యే పదవి పోగొట్టుకున్ననాటి రోజుల్ని ప్రస్తావించారు.. భావోద్వేగానికి గురయ్యారు వైఎస్ జగన్ తనపై పెట్టుకున్న నమ్మకాన్ని నిలబెడతానన్నారు మంత్రి కొడాలి నాని. నాలుగుసార్లు ఎమ్మెల్యేగా గెలిచానని.. జగన్ ఎలాంటి ఏ బాధ్యత అప్పగించినా సమర్థవంతంగా పనిచేస్తానన్నారు. జగన్ పార్టీ స్థాపించిన ఏడాదికి చేరానని.. ఆరేళ్ల క్రితం జూన్ 8న ఇదే రోజు ఎమ్మెల్యే పదవిని పోగొట్టుకున్నానని గుర్తు చేసుకున్నారు. మళ్లీ ఇదే రోజు మంత్రి పదవి దక్కిందని.. పక్కాగా వస్తుందని భావించలేదన్నారు. జగన్‌కు అవకాశం ఉంటే ఇస్తారని అనుకున్నా.. పదవి ఇచ్చినా, ఇవ్వకపోయినా వైసీపీకి, జగన్ వెంట ఉంటా.. ఆయనతో కలిసి పనిచేస్తానన్నారు నాని. వైఎస్ జగన్ ముఖ్యమంత్రి కావాలని ఎన్నో ఆలయాల్లో మొక్కుకున్నానని చెప్పారు కొడాలి నాని. తిరుమల వెంకన్నను దర్శించుకొని.. తన మొక్కును తీర్చుకోబోతున్నట్లు చెప్పారు. ఓ గుడిలో కిరీటం చేయిస్తానని మొక్కుకున్నానని.. మరికొన్ని ఆలయాల్లోనూ మొక్కులు చెల్లించుకోబోతున్నట్లు తెలిపారు. జగన్‌ను ముఖ్యమంత్రిగా చూడటమే తన కోరికని.. ఆ కోరిక నెరవేరిందన్నారు నాని.
కేబినెట్ పదవి దక్కుతుందని ఊహించలేదంటున్నారు మంత్రి పేర్ని నాని. వైఎస్ అడుగుజాడల్లో కొనసాగిన తాను.. 2009లో మంత్రి పదవి వస్తుందని ఆశించానన్నారు. తర్వాత కిరణ్ కుమార్ రెడ్డి హయాంలో అవకాశం కల్పిస్తామన్నారని.. కాని తాను మాత్రం కాంగ్రెస్‌ను వీడి జగన్ వెంట నడిచానన్నారు. 2013 జూన్ 8న తాను, కొడాలి నాని, ఆళ్ల నాని, తానేటి వనితలు ఎమ్మెల్యే పదవుల్ని కోల్పోయామని గుర్తు చేశారు. అప్పుడు జగన్ కోసం ఎమ్మెల్యే పదవిని త్యాగం చేశాం.. మళ్లీ ఇదే రోజు అదే జగన్ గారు మాకు మంత్రులుగా అవకాశం కల్పించారని సంతోషం వ్యక్తం చేశారు. ఇదో గొప్ప అనుభూతిగా ఉందన్నారు నాని.