యువ న్యూస్ ఫిల్మ్ బ్యూరో:

ఆపదలొచ్చినప్పుడు అన్ని దార్లు మూసుకుపోయినట్టనిపిస్తుంది. కానీ.. ధైర్యంగా నిలబడి ఆలోచిస్తే మన కోసం ఏదో ఒకదారి తెరిచే ఉంటుంది అని తెలియజెప్పే హృద్యమైన కథే ‘మల్లేశం’. చేనేత కార్మికుల బతుకు సిత్రాలను చిత్రంగా మలిచి.. అనాదిగా బ్రతుకు ప్రవాహానికి ఎదురీదుతున్న చేనేత కార్మికుల శ్రమను, వారి కళను కళ్లు చెమర్చేలా హృదయానికి హత్తుకునేలా రంగుల ప్రపంచానికి జనరంజకంగా చూపించారు. పద్మశ్రీ అవార్డు గ్రహీత, చేనేత కార్మికుల కోసం ఆసు యంత్రాన్ని క‌నుగొన్న చింత‌కింది మ‌ల్లేశం జీవిత‌క‌థే ‘మ‌ల్లేశం’ చిత్రం. మల్లేశం పాత్రలో ‘పెళ్లి చూపులు’ ఫేమ్ ప్రియదర్శన్ నటించారు. ఒక చీరకు ఆసు పోయాలంటే దారాన్ని పిన్నుల చుట్టూ 9 వేల సార్లు అటూ ఇటూ తిప్పాలి. ఆ రకంగా రోజుకి 18 వేల సార్లు దారాన్ని కండెల చుట్టూ తిప్పితే రెండు చీరలను మాత్రమే నేయగలరు. రోజుకు రెండు చీరెలు నేస్తేనే కార్మికుడికి గిట్టుబాటు అవుతుంది. దారాన్ని కండెల చుట్టూ తిప్పడానికి మల్లేశం తల్లి లక్ష్మి చాలా కష్టపడేవారు. చేతులు, భుజం నొప్పితో బాధపడేవారు. తల్లి వేదన చూడలేకపోయిన మల్లేశం.. హైదరాబాద్ వచ్చి ఏడేళ్లపాటు శ్రమించి ఆసు యంత్రానికి రూపకల్పన చేశారు. ఈ నేపథ్య కథతో హృద్యంగా ‘మల్లేశం’ సినిమాను రూపొందించారు. ఈ చిత్ర సమీక్షలోకి వెళ్తే.. తెలంగాణలోని నల్గొండ జిల్లా శారాజీ పేటలో ‘మల్లేశం’ కథ మొదలవుతుంది. అక్కడ చేనేత వృత్తిని నమ్ముకుని జీవనం కొనసాగిస్తారు. చాలా కుటుంబాలు శ్రమకు తగిన ఫలితం లభించకపోవడం అప్పుల ఊబిలో కూరుకుపోతాయి. చాలా మంది ఆత్మహత్యలు చేసుకుంటారు. చింతకింద మల్లేశం (ప్రియదర్శి) కుటుంబం కూడా ఆర్ధికపరమైన ఇబ్బందులతో చేనేత పనిని కొనసాగిస్తుంటుంది. తల్లిదండ్రులకు (చక్రపాణి, ఝాన్సీ) సాయంగా ఉండటం కోసం ‘మల్లేశం’ ఆరోతరగతిలోనే చదువు మానేస్తాడు. మల్లేశం చిన్నతనం నుంచి అతని తల్లి లక్ష్మీ (ఝాన్సీ) ఆసు పనిచేయడంతో చేయి ఎముకలు అరిగిపోతాయి. నొప్పిని భరిస్తూనే ఆసు పనిచేస్తుంటుంది లక్ష్మి. తల్లి బాధను చూడలేక ఆసుయంత్రాన్ని కనిపెట్టాలని ప్రయత్నిస్తాడు. అందుకోసం ఊరంతా అప్పులు చేస్తాడు. ఎన్నిసార్లు ప్రయత్నించినా మల్లేశం ప్రయత్నం విఫలం అవుతూ ఉంటుంది.
ఈ సంఘర్షణలో మల్లేశానికి అనేక అవమానాలు, అవహేళనలు ఎదురవుతాయి. ఈ తరుణంలో పెళ్లి చేస్తేనే మల్లేశం ఆసు యంత్ర తయారి ఆలోచనను మానుకుంటాడని అతను ప్రేమిస్తున్న మరదలు పద్మ (అనన్య)తో పెళ్లి చేస్తారు. పెళ్లి అయిన తరువాత కూడా తన నిర్ణయాన్ని మార్చుకోడు మల్లేశం. భార్య సాయంతో తన ప్రయత్నాన్ని కొనసాగిస్తాడు. అయితే ఎంతో కష్టపడి చేసిన ఆసు యంత్రం మోటార్ కాలిపోవడంతో మల్లేశంకి ఛీత్కారాలు ఎక్కువ అవుతాయి. కుటుంబ సభ్యుల నుండి మందలింపులు, అప్పుల బాధతో ఆత్మహత్యకు ప్రయత్నిస్తాడు మల్లేశం. అలా చనిపోదామనుకున్న మల్లేశం.. చివరికి ఏమయ్యాడు? ఆసు యంత్రాన్ని ఎలా కనుగొన్నాడు? అన్నదే మిగిలిన కథ. ఇప్పటి వరకూ కామెడీ పాత్రలో నటించిన ప్రియదర్శిలోని సెన్సిబుల్ నటుడ్ని బయటకు తీసింది ‘మల్లేశం’ పాత్ర. తెలంగాణ యాసతో పల్లెటూరి మట్టి సువాసల్ని ఎంతో హృద్యంగా హృదయాలకు హత్తుకునేలా పాత్రలో జీవించారు ప్రియదర్శి. బయోపిక్ అంటే పాత్రకు జీవం పోసే నటులు దొరకాలి. అప్పుడే ఆ పాత్ర పరిపూర్ణం అవుతుంది. ‘మల్లేశం’ సినిమాలో కనిపించే ప్రతి పాత్ర ఒరిజినల్ క్యారెక్టర్స్‌ స్థాయిని పెంచేవిగా కనిపిస్తాయి. మల్లేశం పాత్రలో కనిపించి ప్రియదర్శి మొదలు.. ఆయనకు భార్యగా నటించిన పద్మ (అనన్య).. తల్లిగా నటించిన లక్ష్మి (ఝాన్నీ).. తండ్రిగా నటించిన నరసింహులు (చక్రపాణి) ఆయా పాత్రల్లో పరకాశ ప్రవేశం చేశారు. కమర్షియల్ హంగులకు దూరంగా ఈ బయోపిక్‌ని వాస్తవికతకు చాలా తగ్గరగా చూపించారు దర్శకుడు రాజ్ ఆర్. మల్లేశం సినిమాను చాలా వరకూ రియల్ లొకేషన్లలో చిత్రీకరించడం వల్ల సహజత్వం ప్రతిఫలించింది. తెలంగాణ సంస్కృతి సాంప్రదాయాలు, ఆచార వ్యవహారాలు, బాష, యాసలను గొప్పగా చూపించారు. మేకప్ మందాలు.. పిచ్చి గంతులు.. వెకిలి కామెడీలు లేకుండా చాలా సహజంగా కృత్రిమంగా కథను అల్లి ‘మల్లేశం’ కథలో ప్రేక్షకుడు ఇన్వాల్వ్ అయ్యేలా చేయడంలో దర్శకుడు సక్సెస్ అయ్యాడు. ఓ సాధారణ మామూలు జీవితాన్నే తన కథకు స్క్రీన్ ప్లేగా మలిచి మ్యాజిక్ చేశాడు దర్శకుడు. అయితే స్లో నెరేషన్‌‌తో పాటు ఎమోషనల్ జర్నీ సాఫీగా సాగించడంలో అక్కడక్కడా గతుకులు కనిపిస్తూ ఉంటాయి. బాలు శాండిల్య కెమెరా జిముక్కులతో పల్లెటూరి మట్టి సువాసనల్ని ప్రేక్షకుడు రుచి చూసేటట్లు చేశారు. తెలంగాణ పల్లె అందాల్ని పట్టి చూపించింది. మార్క్ కె రాబిన్ మ్యూజిక్ సినిమా స్థాయిని పెంచింది. గొరేటి ఎంక‌న్న‌, చంద్ర‌బోస్‌, దాశ‌ర‌థి పాటల సాహిత్యం కథతో పాటు జర్నీ చేసేలా ఉన్నాయి. లక్ష్మణ్ ఏలె కళాదర్శకత్వం 1980-1990 నాటి పరిస్థితుల్ని గుర్తు చేసింది. ఈ సినిమా ప్రధానంగా ఆకట్టున్నవి మాటలు.. పెద్దింటి అశోక్ కుమార్ అచ్చమైన తెలంగాణ మాండలికంలో సంభాషణలు అందించారు. సినిమా నిడివి కాస్త తగ్గించేలే ఎడిటర్ నిర్మాణ విలువలు బాగున్నాయి. ఓవరాల్‌గా.. ఇలాంటి బతుకు సిత్రాలను చూపించే చిత్రాలు అప్పుడప్పుడు మాత్రమే వస్తుంటాయి. తప్పకుండా చూడాల్సిన చిత్రం ‘మల్లేశం’.